Salmo 118

Salmo 118

¹Pasalamatan ang Panginoon , dahil siyaʼy mabuti;

ang kanyang tapat na pag-ibig ay walang hanggan.

²Ang lahat ng mamamayan ng Israel ay magsabi,

“Ang kanyang tapat na pag-ibig

ay walang hanggan.”

³Ang lahat ng mga angkan ni Aaron ay magsabi,

“Ang kanyang tapat na pag-ibig

ay walang hanggan.”

⁴Ang lahat ng may takot sa Panginoon ay magsabi,

“Ang kanyang tapat na pag-ibig

ay walang hanggan.”

⁵Sa aking kagipitan, dumulog ako sa Panginoon ,

at akoʼy kanyang sinagot at iniligtas.

⁶Kasama ko ang Panginoon ,

kaya hindi ako matatakot.

Ano ang magagawa ng tao sa akin?

⁷Kasama ko ang Panginoon ,

siya ang tumutulong sa akin.

Makikita ko ang pagkatalo

ng aking mga kaaway.

⁸Mas mabuti pang manalig sa Panginoon ,

kaysa magtiwala sa tao.

⁹Mas mabuting pang manalig sa Panginoon ,

kaysa magtiwala sa mga pinuno.

¹⁰Napaligiran ako ng maraming bansang kaaway ko,

ngunit sa kapangyarihan ng Panginoon

silaʼy tinalo ko.

¹¹Totoong pinaligiran nila ako,

ngunit sa kapangyarihan ng Panginoon silaʼy tinalo ko.

¹²Sinalakay nila ako

na parang mga pukyutan,

ngunit silaʼy napatigil

na parang sinusunog na dayami.

Dahil sa kapangyarihan ng Panginoon ,

silaʼy tinalo ko.

¹³Puspusan nila akong sinalakay,

at halos magtagumpay na sila,

ngunit tinulungan ako ng Panginoon .

¹⁴Ang Panginoon ang aking kalakasan

at siya ang aking awit.

Siya ang nagligtas sa akin.

^15-16Naririnig ang masayang sigawan

ng mga mamamayan ng Diyos

sa kanilang mga tolda

dahil sa kanilang tagumpay.

Ang Panginoon ang nagbigay

sa kanila ng tagumpay

sa pamamagitan ng kanyang kapangyarihan!

Ang kapangyarihan ng Panginoon

ang nagbibigay ng tagumpay!

¹⁷Hindi ako mamamatay,

sa halip ay mabubuhay,

at isasaysay ko ang mga ginawa ng Panginoon .

¹⁸Kahit napakatindi ng parusa ng Panginoon sa akin,

hindi niya niloob na akoʼy mamatay.

¹⁹Buksan ninyo ang pintuan ng Templo ng Panginoon

para sa akin

dahil papasok ako

at siyaʼy aking pasasalamatan.

²⁰Ito ang pintuan ng Panginoon

na ang mga matuwid lang

ang makakapasok.

²¹Magpapasalamat ako sa inyo Panginoon ,

dahil sinagot nʼyo

ang aking dalangin.

Kayo ang nagligtas sa akin.

²²Ang batong itinakwil ng mga tagapagtayo

ang siyang naging batong panulukan.

²³Ang Panginoon ang may gawa nito

at tunay na kahanga-hanga

sa ating paningin.

²⁴Ito ang araw na ginawa ng Panginoon ,

kaya tayoʼy magalak at magdiwang.

²⁵Panginoon , patuloy nʼyo kaming iligtas.

Pagtagumpayin nʼyo kami sa lahat

ng aming ginagawa.

²⁶Pinagpapala ang dumarating sa ngalan ng Panginoon .

Pagpalain sana kayo ng Panginoon

mula sa kanyang Templo.

²⁷Ang Panginoon ay Diyos

at napakabuti niya sa atin.

Magdala tayo ng mga sanga ng punongkahoy

para sa pagdiriwang ng pista,

at pumarada paikot sa altar.

²⁸Panginoon , kayo ang aking Diyos;

nagpapasalamat ako at nagpupuri sa inyo.

²⁹Pasalamatan ang Panginoon ,

dahil siyaʼy mabuti;

ang kanyang tapat na pag-ibig

ay walang hanggan.