Salmo 30

Salmo 30

¹Panginoon , pupurihin ko kayo,

sapagkat akoʼy iniligtas nʼyo.

Hindi nʼyo pinayagang insultuhin ako

ng aking mga kaaway.

²Panginoon kong Diyos,

humingi ako ng tulong sa inyo,

at pinagaling nʼyo ako.

³Iniligtas nʼyo ako sa kamatayan.

Hindi nʼyo niloob na akoʼy mamatay.

⁴Umawit kayo ng mga papuri sa Panginoon ,

kayong mga tapat sa kanya.

Papurihan ninyo ang kanyang

banal na pangalan.

⁵Dahil ang kanyang galit ay hindi nagtatagal,

ngunit ang kanyang kabutihan ay magpakailanman.

Maaaring sa gabi ay may pagluha,

pero pagsapit ng umaga ay may ligaya.

⁶Sa panahon ng aking kaginhawahan

ay aking sinabi,

“Wala akong pangangambahan.”

⁷Itoʼy dahil sa kabutihan nʼyo, Panginoon .

Pinatatag nʼyo ako tulad

ng isang bundok.

Ngunit nang lumayo kayo sa akin,

ako ay nanlumo.

⁸Tumawag ako sa inyo, Panginoon ,

at nanalangin ng ganito:

⁹“Ano ang mapapala mo kung akoʼy mamatay?

Makakapagpuri pa ba ang mga patay?

Maipapahayag pa ba nila ang inyong katapatan?

¹⁰Panginoon , pakinggan nʼyo ako

at kahabagan.

Tulungan nʼyo ako, Panginoon !”

¹¹Ang aking kalungkutan ay pinalitan nʼyo

ng sayaw ng kagalakan.

Hinubad nʼyo sa akin ang damit na panluksa,

at binihisan nʼyo ako ng damit ng kagalakan,

¹²upang hindi ako tumahimik,

sa halip ay umawit ng papuri sa inyo.

Panginoon kong Diyos,

kayo ay aking pasasalamatan magpakailanman.