Salmo 5

Salmo

¹O Panginoon , mga salita koʼy iyong dinggin;

ang mga hinaing koʼy bigyang-pansin.

²Aking Diyos at Hari,

ang paghingi ko ng tulong

ay inyong dinggin,

sapagkat sa inyo ako nananalangin.

³Tuwing umaga, O Panginoon

naririnig ninyo ang aking panalangin.

Bawat umaga, akoʼy humihiling

at umaasa sa inyong kasagutan.

⁴Kayo ay Diyos

na hindi natutuwa sa kasamaan,

at hindi nʼyo tinatanggap

ang taong namumuhay sa kasalanan.

⁵Ang mga mapagmataas

ay hindi mananatili sa inyong harapan.

Ang mga taong gumagawa ng kasamaan

ay inyong kinasusuklaman.

⁶Pinupuksa ninyo

ang mga sinungaling.

Kinasusuklaman ninyo

ang mga mamamatay-tao

at ang mga mandaraya.

⁷Ngunit dahil sa inyong wagas na pag-ibig,

akoʼy makakapasok

sa inyong tahanan.

At bilang paggalang, akoʼy magpapatirapa

sa inyong banal na Templo.

⁸O Panginoon , akoʼy inyong gabayan

tungo sa inyong matuwid na daan,

sapagkat napakarami ng aking kalaban.

Gawin nʼyong madali kong sundan

ang iyong daan na nasa aking harapan.

⁹Sapagkat ang bibig ng aking mga kaaway

ay hindi mapagkakatiwalaan,

ang puso nilaʼy puno ng kapahamakan.

Katulad ng bukas na libingan

ang kanilang lalamunan;

Pawang salitang mapanlinlang

ang kanilang binibitawan.

¹⁰O Diyos, panagutin nʼyo po sila.

Nawaʼy ipahamak sila

ng sarili nilang mga plano.

Itakwil ninyo sila

dahil sa dami ng kanilang pagkakasala,

sapagkat kayoʼy sinusuway nila.

¹¹Ngunit magalak nawa

ang lahat ng nanganganlong sa inyo;

magsiawit nawa sila

nang may kagalakan.

Ingatan nʼyo sila

na nagmamahal sa inyo,

upang silaʼy mapuno ng kagalakan.

¹²Pinagpapala nʼyo Panginoon

ang mga matuwid.

Ang pag-ibig nʼyo ay parang kalasag

na nag-iingat sa kanila.