Salmo 58

Salmo 58

¹Kayong mga pinuno, matuwid ba

ang paghatol ninyo sa mga tao?

²Hindi! Dahil paggawa ng masama

ang laging iniisip ninyo

at namiminsala kayo sa iba

saanman kayo naroroon.

³Ang masasama ay lumalayo sa Diyos

at mula nang isilang ay nagsisinungaling na.

⁴Para silang mga ahas na makamandag.

Parang kobrang tinakpan ang tainga,

⁵hindi nakikinig sa tinig ng mahuhusay

na tagapagpaamo niya.

⁶O Panginoong Diyos, basagin nʼyo po ang kanilang mga ngipin

na parang pangil ng mga leon!

⁷Mawala sana silang tulad ng tubig na natutuyo

at gawin mo ring walang silbi

ang kanilang mga palaso.

⁸Maging tulad sana sila ng kuhol

na parang natutunaw habang gumagapang,

o ng sanggol na patay nang ipinanganak,

na hindi pa nakakita ng liwanag.

⁹Mabilis silang tatangayin ng Diyos,

maging ang mga nabubuhay pa,

mabilis pa sa pag-init ng palayok na inaapuyan ng malakas.

¹⁰Magagalak ang mga matuwid

kapag nakita na nilang pinaghigantihan

ng Diyos ang masasama,

at dumanak na ang kanilang dugo.

¹¹At sasabihin ng mga tao, “Tunay ngang

may gantimpala ang matutuwid

at mayroong Diyos na humahatol sa mundo.”