Salmo 60

Salmo 60

¹O Diyos, itinakwil nʼyo kami

at pinabayaang malupig.

Nagalit kayo sa amin

ngunit ngayon sanaʼy ipakita ninyo

ang inyong kabutihan.

²Niyanig nʼyo ang kalupaan

at pinagbitak-bitak,

ngunit kung maaari, ayusin nʼyo po sana

dahil itoʼy parang babagsak na.

³Labis-labis na hirap

ang ipinaranas ninyo sa amin

na inyong mamamayan.

Para nʼyo kaming nilasing sa alak

at ngayon kamiʼy sumusuray-suray.

⁴Ngunit para sa mga may takot sa inyo,

nagtaas kayo ng bandila bilang palatandaan

ng aming pagtitipon sa oras ng labanan.

⁵Iligtas nʼyo kami at tulungan

sa pamamagitan ng inyong kapangyarihan.

Pakinggan nʼyo kami,

upang kaming mga minamahal nʼyo

ay maligtas.

⁶O Diyos, sinabi nʼyo roon sa inyong templo,

“Magtatagumpay ako! Hahatiin ko ang Shekem at ang kapatagan ng Sucot

upang ipamigay sa aking mga mamamayan.

⁷Sa akin ang Gilead at Manases,

ang Efraim ay gagawin kong tanggulan

at ang Juda ang aking tagapamahala.

⁸Ang Moab ang aking utusan[#60:8 : Sa literal, planggana na panghugas ng mukha, kamay, at paa.]

at ang Edom ay sa akin din.

Sisigaw ako ng tagumpay

laban sa mga Filisteo.”

⁹Sinong magdadala sa akin sa Edom

at sa bayan nito na napapalibutan ng pader?

¹⁰Sino na ang makakatulong, O Diyos,

ngayong itinakwil nʼyo na kami?

Ni hindi na nga kayo sumasama

sa aming mga kawal.

¹¹Tulungan nʼyo kami laban sa aming mga kaaway,

dahil ang tulong ng tao

ay walang kabuluhan.

¹²Sa tulong nʼyo, O Diyos,

kamiʼy magtatagumpay

sapagkat tatalunin nʼyo

ang aming mga kaaway.