Salmo 9

Salmo 9

¹Panginoon , buong puso kitang pasasalamatan.

Ilalahad ko ang lahat

ng inyong ginawang kahanga-hanga.

²Dahil sa inyo, Kataas-taasang Diyos

akoʼy magsasaya.

Magagalak ako at aawit

ng mga papuri para sa inyo.

Aawit ako ng mga papuri para sa inyo.

³Kapag kayoʼy nagpapakita sa aking mga kaaway,

natatakot sila at umaatras;

tumatakas sila at nadadapa,

at sa inyong harapan silaʼy namamatay.

⁴Nakaupo kayo sa inyong trono

bilang matuwid na hukom.

Noong akoʼy inyong hinatulan,

napatunayan nʼyong wala akong kasalanan.

⁵Hinatulan nʼyo at nilipol

ang mga bansang masasamâ,

kaya hindi na sila maaalala magpakailanman.

⁶Tuluyan nang nawala ang aking mga kaaway;

sila ay lubusang nawasak.

Giniba nʼyo rin ang kanilang mga bayan,

at silaʼy lubusan nang makakalimutan.

⁷Ngunit kayo, Panginoon

ay maghahari magpakailanman.

At handa na ang inyong trono

para sa paghatol.

⁸Matuwid ninyong pinamumunuan

ang sangkatauhan,

silaʼy inyong hinahatulan

nang walang pagkiling kaninuman.

⁹Panginoon , kayo ang kanlungan

ng mga inaapi,

at kublihan sa panahon ng kahirapan.

¹⁰Sa inyo nagtitiwala

ang nakakakilala sa inyo,

dahil hindi nʼyo itinatakwil

ang mga lumalapit sa inyo.

¹¹Magsiawit kayo ng papuri

sa Panginoon na hari ng Jerusalem!

Ihayag ninyo sa mga bansa

ang kanyang mga ginawa!

¹²Hindi niya nakakalimutan ang panawagan

ng mga pinahihirapan;

pinaghihigantihan niya

ang mga nagpapahirap sa kanila.

¹³Panginoon , tingnan nʼyo po

ang pagpapahirap sa akin

ng aking mga kaaway.

Maawa kayo sa akin,

at iligtas nʼyo ako sa bingit ng kamatayan,

¹⁴upang masabi ko sa lahat ng tao

sa pintuan ng Zion,

ang inyong mga ginawa,

at akoʼy magagalak at magpupuri

dahil sa inyong pagliligtas.

¹⁵Nangyari mismo sa kanilang bansa

ang binalak nilang masama.

Sila mismo ang nahulog

sa sarili nilang bitag.

¹⁶Kilala ang Panginoon sa kanyang mga gawang matuwid.

Ang masasamaʼy napahamak,

dahil rin sa kanilang masamang gawa.

¹⁷Kamatayan ang hahantungan ng mga masasama.

Ang mga lilimot sa Diyos,

ganyan ang kahihinatnan nila.

¹⁸Ang mga dukha ay hindi laging pababayaan,

at ang pag-asa ng mga mahihirap

ay hindi na mawawala kailanman.

¹⁹O Panginoon , huwag nʼyong pabayaang manaig

ang kakayahan ng mga tao;

tipunin nʼyo sa inyong presensya

at hatulan ang mga taong

hindi kumikilala sa inyo.

²⁰Turuan nʼyo silang matakot Panginoon ,

at nang malaman nilang silaʼy mga tao lamang.