Isaias 18

Paparusahan ng Diyos ang Etiopia

¹Pumapagaspas ang pakpak ng mga kulisap[#Zef. 2:12.]

sa isang lupain sa ibayo ng mga ilog ng Etiopia,

²mula roo'y may dumating na mga sugo

sakay ng mga bangkang yari sa tambo,

at sumusunod sa agos ng Ilog Nilo.

Bumalik na kayo, mabibilis na tagapagbalita,

sa inyong lupain na hinahati ng mga ilog,

sa inyong bayan na ang tao'y matatangkad at makikinis ang balat,

bayang kinagugulatan ng lahat, makapangyarihan at mapanakop.

³Makinig kayong lahat na mga naninirahan sa daigdig!

Abangan ninyo ang pagtataas ng watawat sa ibabaw ng bundok,

hintayin ninyo ang tunog ng trumpeta!

⁴Sapagkat ganito ang sabi sa akin ni Yahweh:

“Buhat sa aking kinaroroonan, tahimik akong nagmamasid,

parang sinag ng araw kung maaliwalas ang langit,

parang ulap na may dalang hamog sa tag-araw.

⁵Sapagkat bago dumating ang anihan kapag tapos na ang pamumulaklak

at kapag nahinog na ang mga ubas,

ang mga sanga ay puputulin ng matatalas na karit

saka itatapon.

⁶Ibibigay sila sa ibong mandaragit

at sa mababangis na hayop.

Kakainin sila ng mga ibon sa tag-araw

at ng mga hayop sa taglamig.”

⁷Sa panahong iyon, dadalhin kay Yahweh na Makapangyarihan sa lahat

ang mga handog na galing sa lupaing ito, sa lupaing hinahati ng mga ilog.

Magpapadala ng kanilang handog ang malakas na bansa,

ang mga taong matatangkad at makikinis ang balat, na kinatatakutan sa buong daigdig.

Pupunta sila sa Bundok ng Zion,

sa lugar na nakalaan sa pagsamba kay Yahweh na Makapangyarihan sa lahat.