Mga Awit 64

Panalangin Upang Ingatan ng Diyos

¹O Diyos, ang hibik ko, ang aking dalangin sana ay pakinggan,

sa pagkaligalig dahil sa kaaway, huwag akong hayaan;

²ipagtanggol ako sa mga pakana't lihim na sabwatan,

niyong mga pangkat na ang binabalak pawang kasamaan.

³Ang kanilang dila'y katulad ng tabak na napakatalas,

tulad ng palasong iniaasinta kung sila'y mangusap.

⁴Sa kublihan nila, sila'y nag-aabang sa mabuting tao,

at walang awa nilang tinutudla sa pagdaan nito.

⁵Sa gawang masama ay nagsasabwatan, nag-uusap sila,

kung saan dadalhin ang patibong nilang di dapat makita.

⁶At ang sasabihin pagkatapos nilang makapagbalangkas,

“Ayos na ayos na itong kasamaang ating binabalak.”

Damdamin ng tao at ang isip niya'y mahiwagang ganap!

⁷Subalit ang Diyos na may palaso ri'y di magpapabaya,

walang abug-abog sila'y tutudlai't susugatang bigla.

⁸Dahilan sa sila'y masamang nangungusap, kaya wawasakin,

at ang makakita sa gayong sinapit sila'y sisisihin;

⁹yaong nakakita'y sisidlan ng takot, ipamamalita

ang gawa ni Yahweh at isasaisip ang kanyang ginawa.

¹⁰Sa gawa ni Yahweh, ang mga matuwid pawang magagalak,

magpupuri sila at sa piling niya ay mapapanatag.