Mga Awit 84

Awit ng Pananabik sa Tahanan ng Diyos

¹Mahal ko ang iyong templo, O Makapangyarihang Yahweh!

²Nasasabik ang lingkod mo na sa templo ay pumasok.

Ang buo kong pagkatao'y umaawit na may lugod,

sa masayang pag-awit ko pinupuri'y buháy na Diyos.

³Panginoon, sa templo mo, mga maya'y nagpupugad,

maging ibong layang-layang sa templo mo'y nagagalak,

may inakay na kalinga sa tabi ng iyong altar;

O Yahweh, hari namin at Diyos na walang hanggan.

⁴Mapalad na masasabi, silang doo'y tumatahan

at palaging umaawit, nagpupuring walang hanggan. (Selah)

⁵Ang sa iyo umaasa'y masasabing mapalad din,

silang mga naghahangad, sa Zion ay makarating.

⁶Habang sila'y naglalakbay sa tigang na kapatagan,

tuyong lupa'y binabaha sa maagap na pag-ulan.

⁷Habang sila'y lumalakad, lalo silang lumalakas,

batid nilang nasa Zion ang Diyos nilang hinahanap.

⁸Dinggin mo ang dalangin ko, O Yahweh, Makapangyarihang Diyos,

O ikaw na Diyos ni Jacob, dinggin mo ang iyong lingkod. (Selah)

⁹Basbasan mo, aming Diyos, itong hari naming mahal,

pagpalain mo po siya pagkat ikaw ang humirang.

¹⁰Kahit isang araw lamang, mas gusto ko sa templo mo,

kaysa isang libong araw na iba ang tahanan ko.

Gusto ko pang maging bantay sa pinto ng iyong templo,

kaysa ako'y tumira sa bahay ng mga palalo.

¹¹Pagkat ang Panginoong Yahweh, pag-asa at sanggalang,

kami'y pinagpapala mo sa pag-ibig mo at dangal.

Hindi siya nagkakait ng mabuting mga bagay

sa sinumang ang gawain ay matuwid at marangal.

¹²O Yahweh, ang Diyos na Makapangyarihan sa lahat,

ang magtiwala sa iyo'y masasabing mapalad!