Wote wanakaribishwa

¹Mwenyezi-Mungu asema:

“Zingatieni haki na kutenda mema,

maana nitawaokoeni hivi karibuni,

watu wataona wazi kwamba ninawakomboeni.

²Heri mtu anayezingatia kikamilifu ninayosema,

anayeshika sheria ya Sabato kwa heshima

na kuepa kutenda uovu wowote.

³“Mgeni anayenitambua mimi Mwenyezi-Mungu asifikiri:

‘Hakika Mwenyezi-Mungu atanitenga na watu wake.’

Naye towashi asiseme:

‘Mimi ni mti mkavu tu!’

⁴Maana mimi Mwenyezi-Mungu nasema:

Towashi ashikaye sheria zangu za Sabato,

anayefanya mambo yanayonipendeza,

na kulizingatia agano langu,

⁵nitampa nafasi maalumu na ya sifa

katika nyumba yangu na kuta zake;

nafasi bora kuliko kuwa na watoto wa kiume na wa kike:

Nitampa jina la kukumbukwa daima,

na ambalo halitafutwa kamwe.

⁶“Watu wageni watakaonikiri mimi Mwenyezi-Mungu,

watakaoniheshimu, wakapenda jina langu na kuwa watumishi wangu,

wote watakaoshika Sabato bila kuikufuru,

watu watakaozingatia agano langu,

⁷hao nitawaleta katika mlima wangu mtakatifu,[#56:7 Taz Mat 21:13; Marko 11:17; Luka 19:46]

na kuwafurahisha katika nyumba yangu ya sala;

tambiko na sadaka zao zitakubaliwa madhabahuni pangu.

Maana nyumba yangu itaitwa:

‘Nyumba ya sala kwa ajili ya watu wote’.

⁸“Hii ni kauli yangu mimi Bwana Mwenyezi-Mungu

ninayewakusanya Waisraeli waliotawanyika.

Licha ya hao niliokwisha kukusanya,

nitawakusanya watu wengine wajumuike nao.”

Viongozi wa Israeli walaumiwa

⁹Enyi wanyama wote wakali,

nanyi wanyama wote wa mwituni,

njoni muwatafune watu wangu.

¹⁰Maana viongozi wao wote ni vipofu;

wote hawana akili yoyote.

Wote ni kama mbwa bubu wasiobweka,

hulala tu na kuota ndoto,

hupenda sana kusinzia!

¹¹Hao ni kama mbwa wenye uchu sana,

wala hawawezi kamwe kutoshelezwa.

Wachungaji hao hawana akili yoyote;

kila mmoja hutafuta faida yake mwenyewe.

¹²Huambiana, “Njoni, twende kutafuta divai;

njoni tunywe tushibe pombe!

Kesho itakuwa kama leo,

tena itakuwa sikukuu kubwa zaidi.”