Sala ya mtu anayedhulumiwa

¹Ee Mwenyezi-Mungu, Mungu wangu, nakimbilia usalama kwako;

uniokoe na wote wanaonidhulumu, unisalimishe.

²La sivyo, watakuja kunirarua kama simba,

wakanivutia mbali, pasiwe na wa kuniokoa.

³Ee Mwenyezi-Mungu, Mungu wangu!

Kama nimetenda moja ya mambo haya:

Kama nimechafua mikono yangu kwa ubaya,

⁴kama nimemlipa rafiki yangu mabaya badala ya mema,

au nimemshambulia adui yangu bila sababu,

⁵basi, adui na anifuatie na kunikamata;

ayakanyage maisha yangu;

na kuniulia mbali.

⁶Inuka ee Mwenyezi-Mungu, kwa hasira yako,

uikabili ghadhabu ya maadui zangu.

Inuka, ee Mungu wangu,

wewe umeamuru haki ifanyike.

⁷Uyakusanye mataifa kandokando yako,

nawe uyatawale kutoka juu.

⁸Wewe, ee Mwenyezi-Mungu, wayahukumu mataifa;

unihukumu kadiri ya uadilifu wangu,

kulingana na huo unyofu wangu.

⁹Uukomeshe uovu wa watu wabaya,[#Taz Ufu 2:23]

uwaimarishe watu walio wema,

ee Mungu uliye mwadilifu,

uzijuaye siri za mioyo na fikira za watu.

¹⁰Mungu ndiye ngao yangu;

yeye huwaokoa wanyofu wa moyo.

¹¹Mungu ni hakimu wa haki;

kila siku hulaumu maovu.

¹²Watu wasipoongoka,

Mungu atanoa upanga wake;

atavuta upinde wake na kulenga shabaha.

¹³Atatayarisha silaha zake za hatari,

na kuipasha moto mishale yake.

¹⁴Tazama! Mtu mbaya hutunga uovu,

hujaa uharibifu

na kuzaa udanganyifu.

¹⁵Huchimba shimo, akalifukua,

kisha hutumbukia humo yeye mwenyewe.

¹⁶Uharibifu wake utamrudia yeye mwenyewe;

ukatili wake utamwangukia yeye binafsi.

¹⁷Nitamshukuru Mwenyezi-Mungu kwani ni mwema;

nitaimba sifa za jina la Mwenyezi-Mungu, Mungu Mkuu.