Mafundisho kuhusu sala

¹Kwanza kabisa, nawasihi muombe dua, msali na kumshukuru Mungu kwa ajili ya watu wote,[#2:1-4 Shukrani na sala Paulo anazowataka waamini watoe zina hadhi ya wakati wote na mahali pote ulimwenguni. Kanisa lilihitaji sana mazingira ya utulivu ili kuweza kuendelea na ufundishaji wa Habari Njema; kwa hiyo watawala pia wanaombewa. Kuhusu fikira za Paulo kuhusu wakuu wa serikali tazama Tito 2:12; 3:1.]

²kwa ajili ya wafalme na wote wenye mamlaka, ili tupate kuishi maisha ya utulivu na amani pamoja na uchaji wa Mungu na mwenendo mwema.[#2:2 Neno “uchaji” (wa Mungu) linatumika mara nyingi katika hizi barua zinazojulikana kama za kichungaji (1Tim 2:2; 3:16; 4:7-8; 6:3,5-6,11; taz pia 2Tim 3:5,12; Tito 2:3,12; 1Pet 1:17; 3:2; 2Pet 1:3,6-7; 3:11). Hili ni jambo la kutazamiwa katika barua ambazo kwa wingi zina shabaha ya kuwaongoza waamini wote kuhusu namna ya kuishi katika mazingira yao ambayo mengine ni magumu.]

³Jambo hili ni jema na lampendeza Mungu Mwokozi wetu,

⁴ambaye anataka watu wote waokolewe na wapate kuujua ukweli.

⁵Maana yuko Mungu mmoja, na pia yuko mmoja anayewapatanisha watu na Mungu, binadamu Kristo Yesu,[#2:5 Aya hii yaonekana kutumia maneno ambayo huenda yalikuwa tamko la imani ya waamini wa kale. Rejea Ebr 8:6; 9:15; 12:24. “Yuko Mungu mmoja” rejea Kumb 6:4 sehemu ambayo inagusiwa pia katika Rom 3:30.]

⁶ambaye alijitoa mwenyewe kuwakomboa watu wote. Huo ulikuwa uthibitisho, wakati ufaao ulipowadia, kwamba Mungu anataka kuwaokoa watu wote.[#2:6 Taz Mat 20:28 maelezo, na rejea Marko 10:45; Gal 1:4; Tito 2:14.]

⁷Kwa sababu hiyo mimi nilitumwa niwe mtume na mwalimu wa watu wa mataifa, niutangaze ujumbe wa imani na ukweli. Nasema ukweli; sisemi uongo!

⁸Basi, popote mnapokutana kufanya ibada nataka wanaume wasali, watu waliojitolea kweli na ambao wanaweza kuinua mikono yao wakisali bila hasira wala ubishi.[#2:8 Namna ya kawaida ya Wayahudi kusali ambayo pia imechukuliwa na Wakristo.]

⁹Hali kadhalika, nawataka wanawake wawe wanyofu na wenye busara kuhusu mavazi yao; wavae sawasawa na si kwa urembo wa mitindo ya kusuka nywele, kujipamba kwa dhahabu, lulu au mavazi ya gharama kubwa,[#2:9-10 Rejea 1Pet 3:3-4. Hapa msomaji lazima afikirie pia desturi za jumuiya nyakati hizo ili kuweza kumwelewa mwandishi ipasavyo, na kuona kwamba kama desturi za nyakati hizo sasa zitakuwa zimepitwa na wakati.]

¹⁰bali kwa matendo mema kama iwapasavyo wanawake wamchao Mungu.

¹¹Wanawake wanapaswa kukaa kimya na kuwa wanyenyekevu wakati wa kujifunza.[#2:11-12 Kuhusu maagizo ya aya hizi taz 1Kor 11:2-16 maelezo na pia 14:34-35 maelezo.]

¹²Mimi simruhusu mwanamke amfundishe au amtawale mwanamume; anapaswa kukaa kimya.

¹³Maana Adamu aliumbwa kwanza, halafu Hawa.

¹⁴Na wala si Adamu aliyedanganywa; bali mwanamke ndiye aliyedanganywa, akaivunja sheria ya Mungu.

¹⁵Hata hivyo, mwanamke ataokolewa kwa kupata watoto, kama akidumu katika imani, upendo, utakatifu na unyofu.[#2:15 Yamkini hapa mwandishi anatilia mkazo kuwa kuoa na mama kupata watoto ni jambo jema, kupinga fikra nyingine za wakati huo kwamba kuoa ni makosa. Rejea 1Tim 4:3. Hii ni sehemu ngumu karibu kuliko zote za Biblia. Ama kweli hakuna mahali katika Biblia ambapo jambo hilo linasemwa.]