Mafanikio ya Solomoni

¹Miaka ishirini, ambayo Solomoni aliijenga nyumba ya Mwenyezi-Mungu na ikulu ilipokwisha kupita,

²Solomoni aliijenga upya miji aliyopewa na Huramu, halafu akawapa Waisraeli miji hiyo waishi humo.[#8:2 Katika 1Fal 9:10-14 Solomoni alimpa Huramu miji hii kama malipo kwa ajili ya miti na dhahabu aliyopokea kutoka Tiro, lakini Huramu aliikataa kwa sababu ilikuwa katika hali duni mno.]

³Baadaye Solomoni alielekea Hamath-zoba na kuuteka,

⁴na kuujenga mji wa Tadmori nyikani. Aliijenga upya miji ya ghala iliyokuwa huko Hamathi.

⁵Kadhalika, Solomoni alijenga miji ifuatayo: Beth-horoni wa juu, na Beth-horoni wa chini, miji yenye ngome, kuta, malango na makomeo,[#8:5 Miji mingi ya wakati huo ilikuwa imezungushiwa ukuta na kuwa na lango moja au mawili ya kuingia ndani. Mtindo huo wa kujenga miji ulikuwa kwa ajili ya kujihami na maadui. Eneo karibu na malango hayo lilitumika aghalabu kwa ajili ya kutatua mizozo ya watu.]

⁶mji wa Baalathi, na miji yake yote ya ghala, magari yake ya kukokotwa na ya wapandafarasi wake, na chochote alichotaka kujenga katika Yerusalemu, Lebanoni au kwingineko katika ufalme wake.

⁷Watu wengine wote waliobaki miongoni mwa Wahiti, Waamori, Waperizi, Wahivi na Wayebusi, yaani wote ambao hawakuwa Waisraeli,[#8:7-9 Watu hawa wote ndio waliokuwa wakazi wa awali wa Kanaani, kabla ya Waisraeli kuingia humo.]

⁸pia wazawa wao ambao Waisraeli hawakuwaangamiza, Solomoni aliwafanyiza kazi za kulazimishwa, na hivi ndivyo wanavyofanya hata sasa.

⁹Lakini kati ya watu wa Israeli, Solomoni hakumfanya mtu yeyote kuwa mtumwa kwa ajili ya kazi yake; wao walikuwa askari, makamanda wa maofisa wake, makamanda wa magari yake ya kukokotwa na wapandafarasi wake.

¹⁰Ifuatayo ndiyo jumla ya maofisa wakuu wa mfalme Solomoni: walikuwa 250, waliokuwa na mamlaka juu ya watu.

¹¹Solomoni alimhamisha binti Farao mfalme wa Misri, kutoka mji wa Daudi, akampeleka kwenye nyumba aliyomjengea. Alisema, “Mke wangu hataishi katika nyumba ya Daudi mfalme wa Israeli, kwa maana mahali pote ambapo sanduku la Mwenyezi-Mungu limekuwa, ni patakatifu.”

¹²Solomoni alimtolea Mwenyezi-Mungu tambiko za kuteketeza juu ya madhabahu aliyokuwa amemjengea Mwenyezi-Mungu mbele ya ukumbi wa hekalu.[#8:12-13 Kutambikia au kumtolea Mungu sadaka ilikuwa ni wadhifa wa makuhani au makasisi wa Israeli, lakini hapa Solomoni anatekeleza wadhifa huo.]

¹³Alitoa tambiko hizo kadiri ilivyotakiwa na amri ya Mose kila siku takatifu, yaani siku za Sabato, sikukuu za mwezi mwandamo, na sikukuu tatu za kila mwaka — sikukuu ya mikate isiyotiwa chachu, sikukuu ya majuma na sikukuu ya vibanda.

¹⁴Akifuata maagizo ya Daudi baba yake, alipanga zamu za kila siku za makuhani na za Walawi waliowasaidia makuhani kusifu na kuzitekeleza kazi zao. Kadhalika aliwapanga walinda malango katika makundi aliyoyaweka kulinda kila lango; maana ndivyo alivyoamuru Daudi, mtu wa Mungu.[#8:14 Maneno hayo yanatumiwa tu hapa katika Biblia kuhusu Daudi. Kwa kawaida katika vitabu vya Wafalme, maneno “mtu wa Mungu” yanatumiwa kuwataja manabii, na mara chache sana katika vitabu vya Mambo ya Nyakati ambapo yanatumiwa mara kadhaa kwa Mose (Kumb 33:1; Yos 14:6; 1Nya 23:14 n.k.), kwa Daudi (hapa) na kwa kumtaja nabii mmoja asiyejulikana (2Nya 25:2-9).]

¹⁵Nao hawakuyaacha maagizo mfalme aliyowaamuru makuhani na Walawi jambo lolote na kuhusu hazina.

¹⁶Basi miradi yote ya Solomoni aliyofanya tangu jiwe la msingi wa nyumba ya Mwenyezi-Mungu lilipowekwa ilikamilika. Hivyo nyumba ya Mwenyezi-Mungu ilimalizika.

¹⁷Kisha Solomoni alikwenda Esion-geberi na Elothi iliyo pwani mwa bahari, katika nchi ya Edomu.

¹⁸Huramu alimpelekea merikebu zilizokuwa chini ya uongozi wa maofisa wake, pamoja na mabaharia stadi. Hao, pamoja na maofisa wa Solomoni, walisafiri hadi Ofiri, na kuchukua kutoka huko dhahabu, wakamletea mfalme Solomoni kiasi cha kilo 15,000.[#8:18 Yamkini mahali panapohusika ni Afrika ya Kaskazini; wengine wanafikiri ni eneo la Arabia kusini.]