¹Mimi mzee nakuandikia wewe Bimkubwa mteule pamoja na watoto wako ninaowapenda kweli. Wala si mimi tu ninayewapenda, bali pia wote wanaoujua ule ukweli wanawapenda nyinyi,[#1 Jina linalotumika hapa na pengine katika A.J. kuwataja watu ambao walikuwa na wadhifa au madaraka fulani katika jumuiya ya waumini wa mahala fulani (Mate 11:30). Hapa mwandishi analitumia kujitaja yeye mwenyewe.; #1 Hapa yahusu jumuiya yote iliyoteuliwa na Mungu na ambayo mwandishi anaitaja hapa kwa picha hiyo ya kimfano (rejea aya 13; 1Pet 5:13).]

²kwa sababu ukweli unakaa nasi milele.

³Neema na huruma na amani zitokazo kwa Mungu Baba na kwa Yesu Kristo, Mwana wa Baba, zitakuwa pamoja nasi katika ukweli na upendo.

Ukweli na upendo

⁴Nilifurahi sana kuona kwamba baadhi ya watoto wako wanaishi katika ukweli kama Baba alivyotuamuru.[#4 3Yoh 3.]

⁵Basi, Bimkubwa, ninalo ombi moja kwako: tupendane. Ombi hili si amri mpya, bali ni amri ileile tuliyokuwa nayo tangu mwanzo.[#5 Yoh 13:34; 15:12,17; 1Yoh 3:11,23; 4:7,11.; #5 1Yoh 2:7; 3:11.]

⁶Upendo maana yake ni kuishi kwa kuzitii amri zake Mungu. Amri mliyoisikia tangu mwanzo ndiyo hii: mnapaswa nyote kuishi katika upendo.

⁷Wadanganyifu wengi wamezuka duniani, watu ambao hawakiri kwamba Yesu Kristo amekuja kwetu, na mwili wa kibinadamu. Mtu asemaye hivyo ni mdanganyifu na ni mpinzani wa Kristo.[#7 1Yoh 2:18,22-23; 4:1-3; ling Mat 7:15. Kuhusu kukana kwamba Yesu Kristo alikuja kwetu katika mwili wa kibinadamu, taz 1Yoh 4:2 na pia utangulizi wa barua hiyo.]

⁸Basi, jihadharini nyinyi wenyewe ili msije mkapoteza kile mlichokishughulikia, bali mpate tuzo lenu kamili.

⁹Asiyezingatia na kudumu katika mafundisho ya Kristo, bali anayakiuka, hana Mungu. Lakini anayedumu katika mafundisho hayo anaye Baba na Mwana.[#9 1Yoh 2:22-24; 4:15.]

¹⁰Basi, kama mtu akija kwenu bila kuwaleteeni mafundisho hayo, msimkaribishe nyumbani kwenu, wala msimsalimu.[#10-11 Yahusu watu walioitembelea jumuiya ya Wakristo wakifundisha mafundisho tofauti na yale ya kweli wakitumaini kutambuliwa kama waalimu, na kutumia vibaya makaribisho waliyopewa na kanisa la hapo. Rejea Gal 1:7-9 ambapo lugha inayotumika ni kama hii hapa.]

¹¹Maana anayemsalimu mtu huyo, anashirikiana naye katika matendo yake maovu.

Hatima

¹²Ninayo mengi ya kuwaambieni, lakini sipendi kufanya hivyo kwa karatasi na wino; badala yake, natumaini kuwatembeleeni na kuzungumza nanyi ana kwa ana, ili furaha yetu ikamilike.

¹³Watoto wa dada yako mteule wanakusalimu.[#13 Taz 2Yoh 1 maelezo. Neno “Dada” linatumika bila shaka kimfano na yahusu kanisa ambalo mwandishi anaandika Barua hii kutoka huko; baadhi wanafikiri lilikuwa kanisa la Efeso.]