Siku ya mwisho

¹Kumbuka kwamba, katika siku za mwisho kutakuwa na nyakati za taabu.[#3:1 Yaani nyakati au siku zitakazotangulia kurudi kwake Yesu Kristo. Kwamba siku hizo za mwisho zitakuwa za taabu taz Mat 24; Marko 13; 2Thes 2:3-12.]

²Watu watakuwa na ubinafsi, wenye tamaa ya fedha, wenye majivuno, wenye kujiona, wenye kumtukana Mungu, wasiowatii wazazi wao, wasio na shukrani na waovu;

³watatokea watu wasio na upendo moyoni, wasio na huruma, wachongezi, walafi na wakali; watachukia chochote kilicho chema;

⁴watakuwa wahaini, wakaidi na waliojaa kiburi; watapenda anasa kuliko kumpenda Mungu.

⁵Kwa nje wataonekana kama watu wenye kumcha Mungu, lakini wataikana nguvu yake. Jiepushe kabisa na watu wa namna hiyo.

⁶Baadhi yao huenda katika nyumba za watu na huwateka wanawake dhaifu waliolemewa mizigo ya dhambi na ambao wanaongozwa na tamaa za kila aina;

⁷wanawake ambao wanajaribu daima kujifunza lakini hawawezi kuufikia ujuzi wa huo ukweli.

⁸Watu hao huupinga ukweli kama vile Yane na Yambre walivyompinga Mose. Hao ni watu wa akili potovu na imani ya uongo.[#3:8 Majina haya yametajwa katika mapokeo ya Kiyahudi ambayo yamewapa majina hayo wale wachawi wanaotajwa katika Kut 7:11-12,22; 9:11.]

⁹Lakini hawataweza kuendelea zaidi kwa maana upumbavu wao utaonekana wazi kwa wote. Ndivyo ilivyokuwa kwa akina Yane na Yambre.

Maagizo ya Mwisho

¹⁰Wewe, lakini, umeyafuata mafundisho yangu, mwenendo wangu, makusudi yangu katika maisha, imani yangu, uvumilivu wangu, upendo wangu, subira yangu,

¹¹udhalimu na mateso. Unayajua mambo yaliyonipata huko Antiokia, Ikonio na Lustra. Nilivumilia udhalimu mkubwa mno! Lakini Bwana aliniokoa katika mambo hayo yote.[#3:11 Rejea Zab 34:19.]

¹²Kila mtu anayetaka kuishi maisha ya kumcha Mungu katika kuungana na Kristo Yesu lazima adhulumiwe.[#3:12 Rejea Mat 5:10-11; Yoh 15:20; Mate 14:22.]

¹³Watu waovu na wadanganyifu wataendelea kuwa wabaya, wakidanganya wengine, na wao wenyewe wakidanganywa.

¹⁴Lakini wewe dumu katika ukweli ule uliofundishwa ukaukubali kabisa. Wawajua wale waliokuwa waalimu wako,[#3:14 Au: “wewe wajua ulijifunza kutoka kwa akina nani”. Maneno ambayo labda yanamhusu Paulo mwenyewe (2Tim 2:2) au hata wengine kama akina mama Loisi na Eunike (2Tim 1:5).]

¹⁵wakumbuka kwamba tangu utoto wako umejua Maandiko Matakatifu ambayo yaweza kukupatia hekima iletayo wokovu kwa njia ya imani kwa Kristo Yesu.

¹⁶Maandiko yote Matakatifu yameandikwa kwa uongozi wa Mungu, na yanafaa katika kufundishia ukweli, kuonya, kusahihisha makosa, na kuwaongoza watu waishi maisha adili,[#3:16 Kuhusu maneno “kwa uongozi wa Mungu” rejea Ebr 4:12; 2Pet 1:21. Neno linalotafsiriwa “kwa uongozi” katika Kigiriki ni neno linaloashiria kitendo cha “kupuliza”, nalo latumika kutilia mkazo chanzo cha hayo Maandiko Matakatifu, kwa hiyo yameongozwa na Mungu.]

¹⁷ili mtu wa Mungu awe mkamilifu, na tayari kabisa kufanya kila kazi njema.[#3:17 Taz 1Tim 6:11.]