Kumbukumbu la Sheria 34

Kifo cha Mose

¹Basi, Mose akaondoka kwenye tambarare ya Moabu, akaenda mlimani Nebo, akapanda kilele cha Pisga kilicho mkabala wa Yeriko. Hapo Mwenyezi-Mungu akamwonesha nchi yote: toka Gileadi mpaka Dani;

²eneo lote la Naftali, eneo la Efraimu na Manase, eneo lote la Yuda mpaka Bahari ya Mediteranea;

³nyika ya Negebu na eneo la nyika ya bonde la Yeriko, mji wa mitende, mpaka Soari.

⁴Kisha Mwenyezi-Mungu akamwambia Mose, “Hii ndiyo nchi ile niliyomwapia Abrahamu, Isaka na Yakobo kwamba nitawapa wazawa wao. Nimekuonesha uione kwa macho yako mwenyewe, lakini hutafika huko.”

⁵Basi, Mose mtumishi wa Mwenyezi-Mungu akafariki huko nchini Moabu, kama Mwenyezi-Mungu alivyokuwa amemesema.

⁶Mwenyezi-Mungu akamzika katika bonde la Moabu, mkabala na mji wa Beth-peori; lakini mpaka leo, hakuna mtu ajuaye mahali alipozikwa.[#34:6 Katika tafsiri hii ambayo inafuatilia makala ya Kiebrania ilivyo, mtendaji wa hicho kitezi na Mwenyezi-Mungu. Kulingana na makala ya vitabu vitano vya kwanza vya Biblia (Pentateuko) iliyotumiwa na Wasamaria (taz Kumb 27:4) ma tafsiri ya Kigiriki ya Septuajinta (LXX) kuna kitenzi: “wakamzika”.]

⁷Mose alikuwa na umri wa miaka 120 alipofariki; macho yake yalikuwa hayajafifia, na alikuwa timamu na mwenye nguvu.

⁸Waisraeli waliomboleza kifo chake kwa muda wa siku thelathini kwenye nchi tambarare ya Moabu. Kisha siku za matanga na maombolezo ya kifo chake zikaisha.

⁹Yoshua mwana wa Nuni alijaa roho ya hekima, kwa kuwa Mose alikuwa amemwekea mikono yake. Hivyo Waisraeli walimtii Yoshua na kufuata amri ambazo Mwenyezi-Mungu alimpa Mose.[#34:9 Hekima hapa inahusu kipaji cha kutambua na kuelewa matakwa ya Mungu (hasa yalivyo katika sheria ya Mose) na kuwaambia watu juu yake.]

¹⁰Hapajatokea tena nabii katika Israeli kama Mose, ambaye Mwenyezi-Mungu aliongea naye ana kwa ana.[#34:10 Mose alikuwa kiongozi wa Waisraeli ambaye alipokea sheria ya Mungu na kuwapa watu wa Mungu. Mose aliongea na Mungu ana kwa ana (Kut 33:11; Hes 12:6-8; Kumb 18:15-18; Sira 45:1-5; Mate 3:22-23).]

¹¹Hakuna nabii mwingine ambaye alifanya ishara na miujiza kama ile ambayo Mwenyezi-Mungu aliyomtuma Mose afanye juu ya mfalme wa Misri, wakuu wake na nchi yake yote.

¹²Hakuna nabii mwingine ambaye amefanya mambo makuu na ya kutisha kama alivyofanya Mose mbele ya Waisraeli wote.