¹Basi, kwa vile ahadi ya kuingia mahali pa pumziko bado ipo, na tuogope ili yeyote kati yenu asije akashindwa kupata pumziko hilo.[#4:1 Taz Ebr 3:7-11 maelezo.]

²Maana Habari Njema imehubiriwa kwetu kama vile ilivyohubiriwa kwa hao watu wa kale. Lakini ujumbe huo haukuwafaa chochote, maana waliusikia lakini hawakuupokea kwa imani.

³Basi, sisi tunaoamini tunapata pumziko hilo aliloahidi Mungu. Kama alivyosema:

“Nilikasirika, nikaapa:

‘Hawataingia mahali pangu pa pumziko.’”

Mungu alisema hayo ingawa kazi yake ilikuwa imekwisha malizika tangu alipoumba ulimwengu.

⁴Maana Maandiko yasema mahali fulani kuhusu siku ya saba: “Mungu alipumzika siku ya saba, akaacha kazi zake zote.”

⁵Tena jambo hili lasemwa pia: “Hawataingia mahali pangu pa pumziko.”[#4:5 Nukuu ya Zab 95:11 tena (rejea Ebr 3:11).]

⁶Basi, hiyo ahadi ya kuingia bado ipo, maana wale waliohubiriwa Habari Njema pale awali walishindwa kuingia humo kwa sababu walikosa kutii.

⁷Mungu aliweka siku nyingine ambayo inaitwa “Leo,” akasema baadaye kwa njia ya Daudi maneno yaliyokwisha tajwa:

“Kama mkisikia sauti ya Mungu leo,

msiwe wakaidi.”

⁸Kama Yoshua angekuwa amewapa watu hao hilo pumziko, Mungu hangalisema baadaye juu ya siku nyingine.[#4:8 Kumb 31:7. “Yoshua”: Neno kwa neno: “Yesu”, namna ya Kigiriki ya kuandika jina la Kiebrania “Yoshua” ambalo linampa mwandishi fursa ya kuonesha ukuu wa Yesu Kristo juu ya Yoshua.]

⁹Kwa hiyo, basi, bado kuna kupumzika kwa watu wa Mungu.

¹⁰Maana, kila aingiaye mahali pa pumziko la Mungu atapumzika kutoka katika kazi yake kama vile pia Mungu alivyopumzika kutoka kazi yake.

¹¹Basi, tujitahidi kuingia katika pumziko hilo, ili asiwepo yeyote miongoni mwetu atakayekataa kutii kama walivyofanya wao.

¹²Neno la Mungu ni hai na lina nguvu; ni kali kuliko upanga wenye makali kuwili. Hukata kabisa mpaka mahali ambapo moyo na roho hukutana, mpaka pale vikutanapo viungo vya mwili na uboho. Neno hilo huchambua nia na fikira za mioyo ya watu.[#4:12 Msemo ambao una maana kadhaa katika Biblia kwa kuafikiana na mazingira ya maandishi. Hata hivyo msemo wajumuisha ufunuo wote wa Kimungu na uwezo au nguvu ya Muumba na ukombozi anaoleta Mungu. Rejea Isa 49:2; Yoh 1:1-18; Efe 6:17; Ebr 1:3; 1Pet 1:23-25.]

¹³Hakuna kiumbe chochote kilichofichika mbele ya Mungu; kila kitu kimefunuliwa wazi mbele ya macho yake yeye ambaye kwake tutapaswa kutoa hoja ya matendo yetu.

Yesu Kuhani Mkuu

¹⁴Basi, tuzingatie kwa makini imani tunayoiungama. Maana tunaye Kuhani Mkuu aliyeingia mpaka mbinguni; Yesu, Mwana wa Mungu.[#4:14 Efe 4:10; Ebr 1:3; 8:1-2; 9:24.]

¹⁵Huyu Kuhani Mkuu wetu anaelewa kabisa unyonge wetu; yeye mwenyewe alijaribiwa kama sisi kwa kila namna lakini hakutenda dhambi.

¹⁶Basi, na tukikaribie bila hofu kiti cha enzi cha Mungu mwenye neema, tupokee huruma na neema ya kutusaidia wakati wa shida.