Hoja ya pili ya Elifazi

¹Kisha Elifazi, Mtemani, akajibu:[#15:1 Taz maelezo ya 2:11.; #15:1—21:34 Katika duru ya pili ya mazungumzo (15:1-21:34), kwa mara nyingine tena, tuna mfululizo wa hoja baina ya Yobu na rafiki zake: Elifazi (sura 15), Yobu (sura 16—17), Bildadi (sura 18), Zofari (sura 20), Yobu (sura 21).]

²“Je, mtu wa hekima hujibu kwa maneno ya upuuzi?

Je, mtu huyo amejaa maneno matupu?

³Je, mwenye hekima hujitetea kwa maneno yasiyofaa,

au kwa maneno yasiyo na maana?

⁴Lakini wewe unapuuza uchaji wa Mungu;

na kuzuia kutafakari mbele ya Mungu.

⁵Uovu wako ndio unaokifundisha kinywa chako,

nawe wachagua kusema kama wadanganyifu.

⁶Maneno yako mwenyewe yanakuhukumu, sio mimi;

matamshi yako yashuhudia dhidi yako.

⁷Je, wewe ni mtu wa kwanza kuzaliwa?[#15:7 Hili ni swali lisilodai jibu. Elifazi anataka kusema Yobu kamwe si mtu wa kwanza kuzaliwa na kushuhudia ulimwengu ukiumbwa na hivyo kujipatia hekima.]

Je, wewe ulizaliwa kabla ya kuweko vilima?

⁸Je, ulipata kuweko katika halmashauri ya Mungu?[#15:8 Yaani malaika na wengine ambao hukutana kuzungumza mambo na Mungu (taz 1:6; 2:1). Rejea Isa 40:13; Yer 23:18; Rom 11:34.]

au, wewe ndiwe peke yako mwenye hekima?

⁹Unajua kitu gani tusichokijua sisi?

Unafahamu kitu gani tusichokifahamu sisi?

¹⁰Miongoni mwetu wapo wazee wenye hekima,[#15:10 Katika utamaduni wa Waisraeli kama vile pia katika tamaduni nyingi za Kiafrika, uzoefu ambao huandamana na uzee ulichukuliwa kuwa chanzo cha hekima na maarifa (taz 8:8; 12:12-13; Zab 119:100).]

wenye miaka mingi kuliko baba yako.

¹¹Je, faraja anazokupa Mungu ni ndogo mno?

Au je, neno lake la upole kwako si kitu?

¹²Mbona moyo unakusukuma kukasirika

na kutoa macho makali,

¹³hata kumwasi Mungu

na kusema maneno mabaya kama hayo?

¹⁴Mtu ni nini hata aweze kuwa mwadilifu?

au yule aliyezaliwa na mwanamke hata aweze kuwa mwema?

¹⁵Ikiwa Mungu hawaamini hata watakatifu wake,

nazo mbingu si safi mbele yake,

¹⁶sembuse binadamu aliye kinyaa na mpotovu

binadamu atendaye uovu kama kunywa maji!

¹⁷“Sasa nisikilize, nami nitakuonesha,

nitakuambia yale niliyoyaona,

¹⁸mafundisho ya wenye hekima,

mambo ambayo wazee wao hawakuyaficha,

¹⁹ambao Mungu aliwapa hiyo nchi peke yao,

wala hakuna mgeni aliyepita miongoni mwao.

²⁰Mwovu atateseka kwa maumivu siku zote,

miaka yote waliyopangiwa wakatili.

²¹Sauti za vitisho zitampigia kelele masikioni,

anapodhani amestawi mwangamizi atamvamia.

²²Mwovu hana tumaini la kutoka gizani;

mwisho wake ni kufa kwa upanga.

²³Hutangatanga kutafuta chakula,

akisema, ‘Kiko wapi?’

Ajua kwamba siku ya giza inamkaribia.

²⁴Taabu na uchungu, vyamtisha;

vyamkabili kama jeshi la mfalme anayeshambulia.

²⁵Kwa sababu amenyosha mkono wake dhidi ya Mungu;[#15:25 Kitendo hiki, kama vile mstari wa pili wa aya hii unavyosema dhahiri, ni ishara ya kiburi na majivuno dhidi ya Mungu (rejea Yobu 22:17).]

akadiriki kumpinga huyo Mungu mwenye nguvu;

²⁶alikimbia kwa kiburi kumshambulia,

huku ana ngao yenye mafundo makubwa.

²⁷Uso wake ameunenepesha kwa mafuta,

na kiuno chake kimejaa mafuta.

²⁸Ameishi katika miji iliyoachwa tupu,

katika nyumba zisizokaliwa na mtu;

nyumba zilizotakiwa ziwe lundo la uharibifu.

²⁹Mtu huyo kamwe hatakuwa tajiri;

wala utajiri wake hautadumu duniani.

³⁰Hatalikwepa giza la kifo.

Ndimi za moto zitakausha chipukizi zake,

maua yake yatapeperushwa na upepo.

³¹Heri aache kutumainia upuuzi na kujidanganya,

maana upuuzi ndio utakaokuwa tuzo lake.

³²Atalipwa kikamilifu kabla ya kufa kwake,

na wazawa wake hawatadumu.

³³Atakuwa kama mzabibu unaopukutisha zabibu mbichi,

kama mzeituni unaoangusha maua yake.

³⁴Wote wasiomcha Mungu hawatapata watoto,

moto utateketeza mahema ya wala rushwa.

³⁵Wanatunga udanganyifu na kuzaa uovu.

mioyo yao hupanga udanganyifu.”