Jibu la Yobu

¹Kisha Yobu akajibu:[#26:1-4 Yobu, kwa mara nyingine tena, anasisitiza kwamba hana hatia. Inawezekana kwamba simulizi hili la Yobu hapa linafuatiwa na lile la 27:1-12.]

²“Aa! Jinsi gani ulivyomsaidia asiye na uwezo!

Jinsi gani ulivyomwokoa asiye na nguvu!

³Jinsi gani ulivyomshauri asiye na hekima,

na kumshirikisha ujuzi wako!

⁴Lakini umetamka hayo kwa ajili ya nani?

Nani aliyekusukuma kuongea hivyo?” Uwezo mkuu wa Mungu

Bildadi akajibu:

⁵“Mizimu huko chini yatetemeka,[#26:5-14 Katika makala ya Kiebrania inaonekana kwamba Yobu ndiye anayeongea katika aya hizi; hata hivyo yawezekana kwamba zinapatana zaidi na mazungumzo ya Bildadi katika 25:1-6.]

maji ya chini na wakazi wake yaogopa.

⁶Kuzimu kuko wazi kabisa mbele ya Mungu.

Abadoni haina kifuniko chochote.

⁷Mungu hutandaza kaskazini mahali patupu,[#26:7 Kiebrania ni “Safon”, neno ambalo linatumiwa pia katika Zab 48:2 na hasa Isa 14:13.]

na hutundika dunia mahali pasipo na kitu,

⁸huyafunga maji mawinguni yawe mazito,

nayo mawingu hayapasuki kwa uzito wake.

⁹Huufunika uso wa mwezi

na kutandaza juu yake wingu.

¹⁰Amechora duara juu ya uso wa bahari,

penye mpaka kati ya mwanga na giza.

¹¹Mungu akitoa sauti ya kukemea,

nguzo za mbingu hutetemeka na kustaajabu.

¹²Kwa nguvu zake aliituliza bahari;

kwa maarifa yake alimwangamiza dude Rahabu.

¹³Kwa pumzi yake aliisafisha anga;

mkono wake ulilichoma joka lirukalo.

¹⁴Yamkini haya ni machache tu ya matendo yake,

ni minong'ono tu tunayosikia juu yake.

Nani awezaye kujua ukuu wa nguvu yake?”