Kiongozi mpya kutoka Bethlehemu

¹Mwenyezi-Mungu asema,

“Lakini wewe Bethlehemu katika Efratha,

wewe ni mdogo tu kati ya jamii za Yuda,

lakini kwako kutatoka mtawala

atakayetawala juu ya Israeli kwa niaba yangu.

Asili yake ni ya zama za kale.”

²Hivyo Mungu atawaacha watu wake kwa maadui,

mpaka yule mama mjamzito atakapojifungua.

Kisha ndugu zake waliobakia,

watarudi na kuungana na Waisraeli wenzao.

³Huyo mtawala atawachunga watu wake kwa nguvu ya Mwenyezi-Mungu,

kwa fahari yake Mwenyezi-Mungu, Mungu wake.

Watu wake wataishi kwa usalama,

maana atakuwa mkuu mpaka miisho ya dunia.

⁴Yeye ndiye atakayeleta amani.[#5:4 Tafsiri yamkini ya makala ngumu. Rejea Zab 72:7; Isa 9:6; 11:6-9; Zek 9:10. Taz pia Efe 2:14 maelezo.]

Ukombozi na adhabu

Waashuru wakivamia nchi yetu,

na kuupenya ulinzi wetu,

tutapeleka walinzi wawakabili,

naam, tutawapeleka viongozi wetu kwa wingi.

⁵Kwa silaha zao wataitawala nchi ya Ashuru,

na kuimiliki nchi ya Nimrodi.

Watatuokoa mikononi mwa Waashuru,

watakapowasili mipakani mwa nchi yetu

na kuanza kuivamia nchi yetu.

⁶Wazawa wa Yakobo watakaobaki hai

wameenea miongoni mwa mataifa mengi,

watakuwa kama umande wa Mwenyezi-Mungu uburudishao,

kama manyunyu yaangukayo penye nyasi

ambayo hayasababishwi na mtu

wala kumtegemea binadamu.

⁷Wazawa wa Yakobo watakaobaki hai,

wameenea miongoni mwa mataifa na watu wengi

watakuwa na nguvu kubwa

kama simba kati ya wanyama wa porini,

kama mwanasimba miongoni mwa makundi ya kondoo,

ambaye kila mahali apitapo,

huyarukia na kuyararua mawindo yake,

asiwepo mtu yeyote wa kuyaokoa.

⁸Waisraeli watawashinda adui zao

na kuwaangamiza kabisa.

⁹Mwenyezi-Mungu asema,

“Wakati huo nitawaondoa farasi wenu,

na kuyaharibu magari yenu ya farasi.

¹⁰Nitaiharibu miji ya nchi yenu,

na kuzibomolea mbali ngome zenu.

¹¹Nitatokomeza matendo yenu ya uchawi,

nanyi hamtakuwa tena na wapiga ramli.

¹²Nitaziharibu sanamu zenu,

na nguzo zenu za ibada;

nanyi mtakoma kuabudu vitu mlivyotengeneza wenyewe.

¹³Nitazing'oa sanamu za Ashera kutoka kwenu,[#5:13 Au: nguzo za Ashera, mungu wa kike wa watu wa Kanaani ambaye mfano wake ulikuwa nguzo au mti.]

na kuiangamiza miji yenu.

¹⁴Kwa hasira na ghadhabu yangu,

nitalipiza kisasi mataifa yote yasiyonitii.”