Mawaidha kwa mfalme

¹Maneno ya mfalme Lemueli. Mawaidha aliyofundishwa na mama yake:[#31:1 Tafsiri nyingine yamkini: “mfalme Lemueli wa Masa”, taz 30:1 “Mawaidha”. Maandishi au mawaidha ya kuwafundisha wafalme vijana jinsi ya kuishi yalikuwa kawaida katika tamaduni za Misri ya kale na Mesopotamia. Hapa mawaidha hayo yanatoka kwa mama.]

²Nikuambie nini mwanangu?

Nikuambie nini mwanangu niliyekuzaa?

Nikuambie nini wewe niliyekuomba kwa Mungu?

³Usimalize nguvu zako kwa wanawake,[#31:3 Kuhusu matatizo na athari za umalaya taz 5:1-23; 7:6-27. Wanawake wa namna hiyo wanaweza kumpotosha mfalme kwa namna mbalimbali.]

usiwape mali yako hao wanaoangamiza wafalme.

⁴Haifai ee Lemueli, haifai wafalme kunywa divai,[#31:4-7 Pombe inasababisha watawala kusahau majukumu yao, wasiweze kutekeleza haki za jamii hasa wanyonge (Mhub 10:16,17; Isa 5:21-24; 28:7-13). Katika aya 6-7 pombe inaruhusiwa kwa ajili ya kuwapunguzia maumivu walio katika hali mahututi, lakini mwandishi hasemi kamwe kwamba hilo lichukuliwe kama kisingizio cha kuingia katika hali hiyo.]

wala wakuu kutamani vileo.

⁵Wakinywa watasahau maagizo ya sheria,

na kuwanyima haki wenye taabu.

⁶Mpe kileo mtu anayekufa,

wape divai wale wenye huzuni tele;

⁷wanywe na kusahau umaskini wao,

wasikumbuke tena taabu yao.

⁸Lakini wewe, lazima useme kwa ajili ya wote walio bubu;

na kutetea haki za wote wasiojiweza.

⁹Sema kwa ajili yao na kuamua kwa haki,

linda haki za maskini na fukara.

Mke mwema

¹⁰Mke mwema kweli, apatikana wapi?[#31:10 Katika Kiebrania aya 10 mpaka 31 ni utenzi ambao umeundwa kwa kufuatia alfabeti za Kiebrania. Taz Zab 119 (utangulizi) maelezo. Kwa mtindo huo wa pekee wa utenzi mwandishi anafanikiwa kutoa orodha ndefu ya sifa za mke aliye kweli mwema. Mke huyo mwema anafanana na yule mwanamke “Hekima” ambaye anatajwa katika 1:20-33; 8:1—9:12.]

Huyo ana thamani kuliko johari!

¹¹Mumewe humwamini kwa moyo,

kwake atapata faida daima.

¹²Kamwe hamtendei mumewe mabaya,

bali humtendea mema maisha yake yote.

¹³Hutafuta sufu na kitani,

na kufanya kazi kwa mikono yake kwa bidii.

¹⁴Yeye ni kama meli za biashara:

huleta chakula chake kutoka mbali.

¹⁵Huamka kabla ya mapambazuko,

akaitayarishia jamaa yake chakula,

na kuwagawia kazi watumishi wake.

¹⁶Hufikiria kununua shamba, kisha hulinunua,

na kulima zabibu kwa faida ya jasho lake.

¹⁷Huwa tayari kufanya kazi kwa nguvu

na kuiimarisha mikono yake.

¹⁸Hutambua kwamba shughuli zake zina faida;

hufanya kazi hata usiku kwa mwanga wa taa yake.

¹⁹Husokota nyuzi kwa mikono yake mwenyewe,

kwa vidole vyake mwenyewe husuka nguo zake.

²⁰Huufungua mkono wake kuwapa maskini,

hunyosha mkono kuwasaidia fukara.

²¹Hawahofii watu wake ijapo baridi ya kipupwe,

maana kila mmoja anazo nguo za kutosha.

²²Hujitengenezea matandiko,

mavazi yake ni ya zambarau ya kitani safi.

²³Mume wake ni mtu mashuhuri barazani,[#31:23 Sifa za mumewe zinakwenda sambamba na sifa za mkewe katika 31:31.]

anakoshiriki vikao vya wazee wa nchi.

²⁴Mwanamke huyo hutengeneza nguo na kuziuza,

huwauzia wafanyabiashara mishipi.

²⁵Nguvu na heshima ndizo sifa zake,

hucheka afikiriapo wakati ujao.

²⁶Hufungua kinywa kunena kwa hekima,

huwashauri wengine kwa wema.

²⁷Huchunguza yote yanayofanyika nyumbani mwake,

kamwe hakai bure hata kidogo.

²⁸Watoto wake huamka na kumshukuru,

mumewe huimba sifa zake.

²⁹Husema, “Wanawake wengi wametenda mambo ya ajabu,

lakini wewe umewashinda wote.”

³⁰Madaha huhadaa na uzuri haufai,

bali mwanamke amchaye Mwenyezi-Mungu atasifiwa.

³¹Jasho lake lastahili kulipwa,

shughuli zake hazina budi kuheshimiwa popote.