Maombolezo

¹Uniokoe, ee Mungu;

maji yamenifika shingoni.

²Ninazama ndani ya matope makuu,

hamna hata mahali pa kuweka miguu.

Nimetumbukia kwenye kilindi cha maji,

nachukuliwa na mawimbi.

³Niko hoi kwa kupiga yowe,[#69:3 Hali ya namna hiyo hiyo inatajwa katika 6:6-7.]

na koo langu limekauka.

Macho yangu yamefifia,

nikikungojea ewe Mungu wangu.

⁴Watu wengi kuliko nywele zangu ndio wanichukiao bure.[#69:4 Zab 35:19; Yoh 15:25.]

Wana nguvu sana hao wanaotaka kuniua,

hao wanaonishambulia kwa mambo ya uongo.

Je, nirudishe kitu ambacho sikuiba?

⁵Ee Mungu, waujua upumbavu wangu;

makosa yangu hayakufichika kwako.

⁶Wanaokutumainia wasiaibishwe kwa sababu yangu,

ee Bwana Mwenyezi-Mungu wa majeshi;

wanaokutafuta, wasione fedheha kwa sababu yangu

ee Mungu wa Israeli.

⁷Kwa ajili yako nimefedheheshwa,[#69:7 Huyu Mwanazaburi haoni kwamba mateso yake yamesababishwa na dhambi zake, ila anateseka kwa ajili ya Mungu. Hali hii inaonesha kwa nini katika A.J. Zaburi hii imechukuliwa kuelezea mateso ya Yesu Kristo ambaye alipatwa na hali ya mateso ya namna hii. Taz pia 22:1.]

aibu imefunika uso wangu.

⁸Nimekuwa mgeni kwa ndugu zangu,

kaka na dada zangu hawanitambui.

⁹Upendo wangu kwa nyumba yako unanimaliza.

Kashfa zote wanazokutolea wewe zimenipata mimi.

¹⁰Nilipojinyenyekesha kwa kufunga,

watu walinilaumu.

¹¹Nilipovaa vazi la gunia kuomboleza,

wao walinidharau.

¹²Watu wananisengenya mabarabarani;

walevi wanatunga nyimbo juu yangu.

¹³Lakini mimi nakuomba wewe, ee Mwenyezi-Mungu;

nikubalie ombi langu wakati unaopenda, ee Mungu.

Kwa wingi wa fadhili zako unijibu.

Wewe ni mkombozi wa kuaminika.

¹⁴Kwa msaada wako amini uniokoe

nisizame katika matope;

uniokoe na hao wanaonichukia,

unisalimishe kutoka vilindi vya maji.

¹⁵Usiniache nikumbwe na mkondo wa maji,

au nizame kwenye kilindi

au nimezwe na kifo.

¹⁶Unijibu, ee Mwenyezi-Mungu,

kwa wema na fadhili zako;

unielekee kwa wingi wa huruma yako.

¹⁷Usimfiche mtumishi wako uso wako;

unijibu haraka, maana niko hatarini.

¹⁸Unijie karibu na kunikomboa,

uniokoe na maadui zangu wengi.

¹⁹Wewe wajua ninavyotukanwa,

wajua aibu na kashfa ninazopata;

na maadui zangu wote wewe wawajua.

²⁰Kashfa zimeuvunja moyo wangu,

nami nimekata tamaa.

Nimetafuta kitulizo lakini sikupata,

wa kunifariji lakini sikumpata.

²¹Walinipa sumu kuwa chakula,

na nilipokuwa na kiu wakanipa siki.

²²Karamu zao na ziwe mtego kwao,

na sikukuu zao za sadaka ziwanase.

²³Macho yao yatiwe giza wasiweze kuona,

uitetemeshe daima migongo yao.

²⁴Uwamwagie hasira yako,

ghadhabu yako iwakumbe.

²⁵Kambi zao ziachwe mahame,

asiishi yeyote katika mahema yao.

²⁶Maana wanawatesa wale uliowaadhibu,

wanawaongezea majeraha wale uliowajeruhi.

²⁷Uwaadhibu kwa kila uovu wao;

uwakatalie kabisa msamaha wako.

²⁸Uwafute katika kitabu cha walio hai,[#69:28 Taz 40:7 maelezo. Mfano wa kitabu cha Mungu ambamo yameorodheshwa majina ya watu wake wote kinatajwa pia katika 87:6; Kut 32:32-33; Dan 12:1; Fil 4:3; Ufu 3:5; 13:8; 17:8; 20:12.]

wasiwemo katika orodha ya waadilifu.

²⁹Lakini mimi mnyonge na mgonjwa;

uniinue juu, ee Mungu, uniokoe.

³⁰Kwa wimbo nitalisifu jina la Mungu,

nitamtukuza kwa shukrani.

³¹Jambo hili litampendeza Mwenyezi-Mungu zaidi,

kuliko kumtolea tambiko ya ng'ombe,

kuliko kumtolea fahali mzimamzima.

³²Wanyonge wataona hayo na kufurahi;

wanaomheshimu Mungu watapata moyo.

³³Mwenyezi-Mungu huwasikiliza fukara;

hatawasahau kamwe watu wake wafungwa.

³⁴Enyi mbingu na dunia msifuni Mungu;

bahari na vyote vilivyomo, msifuni.

³⁵Maana Mungu atauokoa mji Siyoni,

na kuijenga tena miji ya Yuda.

Watu wake wataishi humo na kuimiliki;

³⁶wazawa wa watumishi wake watairithi,

wale wanaopenda jina lake wataishi humo.