Changizo kwa ajili ya watakatifu

¹Basi kuhusu changizo kwa ajili ya watakatifu: Kama nilivyoyaagiza makanisa ya Galatia, fanyeni vivyo hivyo.

²Siku ya kwanza ya kila juma, kila mmoja wenu atenge kiasi cha fedha, kulingana na mapato yake, na fedha hizo aziweke akiba, ili nitakapokuja pasiwe na lazima ya kufanya mchango.

³Kwa hiyo nitakapowasili, nitawapa wale mtakaowachagua barua za kuwatambulisha, ili kuwatuma wapeleke zawadi zenu huko Yerusalemu.

⁴Ikionekana ni vyema na mimi niende, basi hao watu watafuatana nami.

Mahitaji binafsi

⁵Baada ya kupitia Makedonia nitakuja kwenu, maana ninakusudia kupitia Makedonia.

⁶Huenda nitakaa nanyi kwa muda, au hata kukaa nanyi kipindi chote cha baridi, ili mweze kunisaidia katika safari yangu, popote niendapo.

⁷Kwa maana sitaki niwaone sasa na kupita tu; natarajia kuwa nanyi kwa muda wa kutosha, kama Bwana akipenda.

⁸Lakini nitakaa Efeso hadi wakati wa Pentekoste,

⁹kwa maana mlango mkubwa umefunguliwa kwangu kufanya kazi yenye matunda, nako huko kuna adui wengi wanaonipinga.

¹⁰Ikiwa Timotheo atakuja kwenu, hakikisheni kwamba hana hofu yoyote akiwa nanyi, kwa sababu anafanya kazi ya Bwana, kama mimi nifanyavyo.

¹¹Basi asiwepo mtu atakayekataa kumpokea. Msafirisheni kwa amani ili aweze kunijia tena. Namtarajia pamoja na ndugu.

¹²Basi kwa habari za ndugu yetu Apolo, nimemsihi kwa bidii aje kwenu pamoja na hao ndugu. Ingawa alikuwa hapendi kabisa kuja sasa, lakini atakuja apatapo nafasi.

Maneno ya mwisho

¹³Kesheni; simameni imara katika imani; kuweni mashujaa na hodari.

¹⁴Fanyeni kila kitu katika upendo.

¹⁵Ninyi mnajua kwamba watu wa nyumbani mwa Stefana ndio walikuwa wa kwanza kuamini katika Akaya, nao wamejitoa kwa ajili ya kuwahudumia watakatifu. Ndugu nawasihi,

¹⁶mjitie katika kuwahudumia watu kama hawa na kila mmoja aingiaye kwenye kazi na kuifanya kwa bidii.

¹⁷Nilifurahi Stefana, Fortunato na Akaiko walipofika, kwa sababu wamenipatia yale niliyopungukiwa kutoka kwenu.

¹⁸Kwa kuwa waliiburudisha roho yangu na zenu pia. Watu kama hawa wanastahili kutambuliwa.

Salamu za mwisho

¹⁹Makanisa ya jimbo la Asia yanawasalimu.

Akila na Prisila pamoja na kanisa lililoko nyumbani mwao wanawasalimu sana katika Bwana.

²⁰Ndugu wote walio hapa wanawasalimu. Salimianeni kwa busu takatifu.

²¹Mimi, Paulo, naandika salamu hizi kwa mkono wangu mwenyewe.

²²Kama mtu yeyote hampendi Bwana Yesu Kristo, na alaaniwe. Bwana wetu, njoo.[#16:22 kwa Kiaramu ni]

²³Neema ya Bwana Yesu iwe nanyi.

²⁴Upendo wangu uwe nanyi nyote katika Kristo Yesu. Amen.