¹Kisha wanaume wa Kiriath-Yearimu wakaja na kulichukua Sanduku la Bwana . Wakalipeleka katika nyumba ya Abinadabu kilimani, na kumweka Eleazari mwanawe wakfu kulichunga Sanduku la Bwana .

²Sanduku la Bwana lilibakia huko Kiriath-Yearimu kwa muda mrefu, jumla ya miaka ishirini.

Samweli awatiisha Wafilisti huko Mispa

Nao watu wote wa Israeli wakamrudia Bwana .

³Naye Samweli akawaambia nyumba yote ya Israeli, “Ikiwa mtamrudia Bwana kwa mioyo yenu yote, basi iacheni miungu migeni na Maashtorethi, na kujitoa wenyewe kwa Bwana na kumtumikia yeye peke yake, naye atawaokoa ninyi kutoka kwa mkono wa Wafilisti.”

⁴Hivyo Waisraeli wakaweka mbali Mabaali yao na Maashtorethi yao, nao wakamtumikia Bwana peke yake.

⁵Kisha Samweli akasema, “Wakusanyeni Israeli wote huko Mispa, nami nitawaombea kwa Bwana .”

⁶Walipokwisha kukutanika huko Mispa, walichota maji na kuyamimina mbele za Bwana . Siku hiyo walifunga na wakaungama, wakisema, “Tumetenda dhambi dhidi ya Bwana .” Naye Samweli alikuwa kiongozi wa Israeli huko Mispa.[#7:6 yaani mwamuzi]

⁷Wafilisti waliposikia kwamba Israeli wamekusanyika huko Mispa, watawala wa Wafilisti wakapanda ili kuwashambulia. Waisraeli waliposikia habari hiyo, waliogopa kwa sababu ya Wafilisti.

⁸Wakamwambia Samweli, “Usiache kumlilia Bwana , Mungu wetu, kwa ajili yetu, ili apate kutuokoa na mikono ya Wafilisti.”

⁹Kisha Samweli akamchukua mwana-kondoo anyonyaye na kumtoa mzima kuwa sadaka ya kuteketezwa kwa Bwana . Akamlilia Bwana kwa niaba ya Israeli, naye Bwana akamjibu.

¹⁰Samweli alipokuwa anatoa hiyo dhabihu ya kuteketezwa, Wafilisti wakasogea karibu ili kupigana vita na Israeli. Lakini siku ile Bwana alinguruma kwa ngurumo kubwa dhidi ya Wafilisti na kuwafanya wafadhaike na kutetemeka hivi kwamba walikimbizwa mbele ya Waisraeli.

¹¹Wanaume wa Israeli wakatoka mbio huko Mispa na kuwafuatia Wafilisti, wakiwachinja njiani hadi mahali chini ya Beth-Kari.

¹²Ndipo Samweli akachukua jiwe na kulisimamisha kati ya Mispa na Sheni. Akaliita Ebenezeri, akisema, “Hadi sasa Bwana ametusaidia.”[#7:12 maana yake Jiwe la usaidizi]

¹³Basi Wafilisti wakashindwa na hawakuvamia nchi ya Israeli tena.

Katika maisha yote ya Samweli, mkono wa Bwana ulikuwa dhidi ya Wafilisti.

¹⁴Miji kuanzia Ekroni hadi Gathi, ambayo Wafilisti walikuwa wameiteka kutoka Israeli, ilirudishwa kwake, naye Israeli akazikomboa nchi jirani mikononi mwa Wafilisti. Kukawa na amani kati ya Israeli na Waamori.

¹⁵Samweli akaendelea kuwa mwamuzi wa Israeli siku zote za maisha yake.

¹⁶Mwaka hadi mwaka aliendelea kuzunguka kutoka Betheli hadi Gilgali na Mispa, akiamua Israeli katika sehemu hizo zote.

¹⁷Lakini kila mara alirudi Rama, kulikokuwa nyumbani mwake, huko pia aliamua Israeli. Naye huko alimjengea Bwana madhabahu.