Maombolezo na wito wa toba

¹Sikia neno hili, ee nyumba ya Israeli, ombolezo hili ninalifanya kuwahusu ninyi:

²“Bikira Israeli ameanguka,

kamwe hatainuka tena,

ameachwa pweke katika nchi yake,

hakuna yeyote wa kumwinua.”

³Hili ndilo asemalo Bwana Mwenyezi:

“Mmoja wa miji yako utakapopeleka watu elfu moja vitani kwa ajili ya Israeli,

mia moja tu watarudi;

wakati mji utakapopeleka mia moja,

kumi tu ndio watarudi hai.”

⁴Hili ndilo asemalo Bwana kwa nyumba ya Israeli:

“Nitafuteni mpate kuishi;

⁵msitafute Betheli,

msiende Gilgali,

msisafiri kwenda Beer-Sheba.

Kwa maana kwa hakika Gilgali itaenda uhamishoni,

na Betheli itafanywa kuwa ubatili.”

⁶Mtafuteni Bwana mpate kuishi,

au atafagia nyumba ya Yusufu kama moto;

utawateketeza, nayo Betheli

haitakuwa na yeyote wa kuuzima.

⁷Ninyi ambao mnageuza haki kuwa uchungu

na kuiangusha haki chini

⁸(yeye ambaye alifanya Kilimia na Orioni,

ambaye hugeuza giza kuwa mapambazuko

na mchana kuwa usiku,

ambaye huyaita maji ya bahari

na kuyamwaga juu ya nchi:

Bwana ndilo jina lake;

⁹yeye hufanya maangamizi kwenye ngome

na kufanya mji uliozungushiwa ngome kuwa ukiwa),

¹⁰mnamchukia yule akemeaye mahakamani,

na kumdharau yule ambaye husema kweli.

¹¹Mnamgandamiza maskini

na kumlazimisha awape nafaka.

Kwa hiyo, ingawa mmejenga majumba ya mawe ya fahari,

hamtaishi ndani yake;

ingawa mmepanda mashamba mazuri ya mizabibu,

hamtakunywa divai yake.

¹²Kwa kuwa ninajua hesabu ya makosa yenu

na ukubwa wa dhambi zenu.

Mmewadhulumu wenye haki na kupokea rushwa

na kuzuia haki ya maskini mahakamani.

¹³Kwa hiyo mtu mwenye busara hunyamaza nyakati kama hizo,

kwa kuwa nyakati ni mbaya.

¹⁴Tafuteni mema, wala si mabaya,

ili mpate kuishi.

Ndipo Bwana Mungu wa majeshi atakuwa pamoja nanyi,

kama msemavyo yupo nanyi.

¹⁵Yachukieni maovu, yapendeni mema;

dumisheni haki mahakamani.

Yamkini Bwana Mungu wa majeshi

atawahurumia mabaki ya Yusufu.

¹⁶Kwa hiyo hili ndilo Bwana, Bwana Mungu wa majeshi, asemalo:

“Kutakuwa na maombolezo barabarani zote,

na vilio vya uchungu katika njia kuu zote.

Wakulima wataitwa kuja kulia,

na waombolezaji waje kuomboleza.

¹⁷Kutakuwa na kuomboleza katika mashamba yote ya mizabibu,

kwa kuwa nitapita kati yenu,”

asema Bwana .

Siku ya Bwana

¹⁸Ole wenu ninyi mnaoitamani

siku ya Bwana !

Kwa nini mnaitamani siku ya Bwana ?

Siku hiyo itakuwa giza, si nuru.

¹⁹Itakuwa kama vile mtu aliyemkimbia simba

kumbe akakutana na dubu,

kama vile mtu aliyeingia nyumbani mwake

na kuupumzisha mkono wake kwenye ukuta,

kumbe akaumwa na nyoka.

²⁰Je, siku ya Bwana haitakuwa giza, na si nuru:

giza nene, bila mwali wowote?

²¹“Ninachukia, ninazidharau sikukuu zenu za dini;

siwezi kuvumilia makusanyiko yenu.

²²Hata ingawa mnaniletea sadaka zenu za kuteketezwa na sadaka za nafaka,

sitazikubali.

Ingawa mnaniletea sadaka nzuri za amani,

sitazitambua.

²³Niondoleeni kelele za nyimbo zenu!

Sitasikiliza sauti za vinubi vyenu.

²⁴Lakini acheni haki itiririke kama mto,

na uadilifu uwe kama kijito kisichokauka!

²⁵“Je, mliniletea dhabihu na sadaka

kwa miaka arobaini kule jangwani,

ee nyumba ya Israeli?

²⁶Mmeyainua madhabahu ya Sikuthi

mungu wenu mtawala,

na Kiuni mungu wenu wa nyota,

ambao mliwatengeneza wenyewe.

²⁷Kwa sababu hiyo nitawapeleka uhamishoni mbali kupita Dameski,”

asema Bwana , ambaye jina lake ni Mungu wa majeshi.