Kila kitu ni ubatili

¹Maneno ya Mhubiri, mwana wa Daudi, mfalme huko Yerusalemu:

²“Ubatili! Ubatili!”

Mhubiri anasema.

“Ubatili mtupu!

Kila kitu ni ubatili.”

³Mwanadamu anafaidi nini kutokana na kazi yake yote

anayotaabikia chini ya jua?

⁴Vizazi huja na vizazi hupita,

lakini dunia inadumu milele.

⁵Jua huchomoza na jua huzama,

nalo huharakisha kurudi mawioni.

⁶Upepo huvuma kuelekea kusini

na kugeukia kaskazini;

hurudia mzunguko huo huo,

daima ukirudia njia yake.

⁷Mito yote hutiririka baharini,

hata hivyo bahari kamwe haijai.

Mahali mito inapotoka,

huko hurudi tena.

⁸Vitu vyote vinachosha,

kuliko mtu anavyoweza kusema.

Jicho kamwe halitosheki kutazama,

wala sikio halishibi kusikia.

⁹Kile kilichokuwepo kitakuwepo tena,

kile kilichofanyika kitafanyika tena,

hakuna kilicho kipya chini ya jua.

¹⁰Kuna kitu chochote ambacho mtu anaweza kusema,

“Tazama! Kitu hiki ni kipya”?

Kilikuwepo tangu zamani za kale,

kilikuwepo kabla ya wakati wetu.

¹¹Hakuna kumbukumbu ya watu wa zamani,

hata na wale ambao hawajaja bado

hawatakumbukwa

na wale watakaofuata baadaye.

Hekima ni ubatili

¹²Mimi, Mhubiri, nilikuwa mfalme wa Israeli katika Yerusalemu.

¹³Nilitumia muda wangu wote kujifunza na kuvumbua kwa hekima yote yanayofanyika chini ya mbingu. Jinsi gani Mungu ameweka mzigo mzito juu ya wanadamu!

¹⁴Nimeshaona mambo yote yanayotendeka chini ya jua, hayo yote ni ubatili, hii ni kukimbiza upepo.

¹⁵Kilichopindika hakiwezi kunyooshwa;

kile ambacho hakipo haiwezekani kukihesabu.

¹⁶Niliwaza mwenyewe, “Tazama, nimekua na kuongezeka katika hekima kuliko yeyote aliyewahi kutawala Yerusalemu kabla yangu. Nimekuwa na uzoefu mkubwa wa hekima na maarifa.”

¹⁷Ndipo nilipojitahidi kufahamu kutofautisha hekima, wazimu na upumbavu, lakini nikatambua hata hili nalo ni kukimbiza upepo.

¹⁸Kwa kuwa hekima nyingi huleta huzuni kubwa;

maarifa yanapoongezeka, masikitiko yanaongezeka.