¹Neno la Bwana likanijia kusema:

²“Mwanadamu, toa unabii na useme: ‘Hili ndilo asemalo Bwana Mwenyezi:

“ ‘Ombolezeni ninyi na mseme,

“Ole wa siku ile!”

³Kwa kuwa siku ile imekaribia,

siku ya Bwana imekaribia,

siku ya mawingu,

siku ya maangamizi kwa mataifa.

⁴Upanga utakuja dhidi ya Misri,

nayo maumivu makuu yataijia Kushi.

Mauaji yatakapoangukia Misri,

utajiri wake utachukuliwa

na misingi yake itabomolewa.

⁵Kushi na Putu, Ludi na Arabia yote, Kubu na watu wa nchi ya agano watauawa kwa upanga pamoja na Misri.

⁶“ ‘Hili ndilo asemalo Bwana :

“ ‘Wale walioungana na Misri wataanguka

na kiburi cha nguvu zake kitashindwa.

Kutoka Migdoli hadi Aswani,

watauawa ndani yake kwa upanga,

asema Bwana Mwenyezi.

⁷Hizo nchi zitakua ukiwa

miongoni mwa nchi zilizo ukiwa,

nayo miji yao itakuwa magofu

miongoni mwa miji iliyo magofu.

⁸Ndipo watajua kuwa mimi ndimi Bwana ,

nitakapoiwasha Misri moto

na wasaidizi wake wote watapondwa.

⁹“ ‘Siku hiyo wajumbe watatoka kwangu kwa merikebu, ili kuwatia hofu Ethiopia, wakiwa katika hali yao ya kuridhika. Maumivu makali yatawapata siku ya maangamizi ya Misri, kwa kuwa hakika itakuja.

¹⁰“ ‘Hili ndilo asemalo Bwana Mwenyezi:

“ ‘Nitakomesha makundi ya Misri

kwa mkono wa Nebukadneza mfalme wa Babeli.

¹¹Yeye na jeshi lake, taifa lililo katili

kuliko mataifa yote,

ataletwa ili kuangamiza nchi.

Watafuta panga zao dhidi ya Misri

na kuijaza nchi kwa waliouawa.

¹²Nitakausha vijito vya Mto Naili,

na kuiuza nchi kwa watu waovu;

kwa mkono wa wageni, nitaifanya nchi ukiwa

na kila kitu kilicho ndani yake.

Mimi Bwana nimenena haya.

¹³“ ‘Hili ndilo asemalo Bwana Mwenyezi:

“ ‘Nitaangamiza sanamu

na kukomesha vinyago katika Memfisi.

Hapatakuwa tena na mkuu katika nchi ya Misri,

nami nitaeneza hofu katika nchi nzima.

¹⁴Nitaifanya Pathrosi kuwa ukiwa[#30:14 yaani Misri ya Juu]

na kuitia moto Soani,

nami nitaipiga Thebesi kwa adhabu.

¹⁵Nitaimwaga ghadhabu yangu juu ya Pelusiumu,[#30:15 Kiebrania ni Sini]

ngome ya Misri,

nami nitakatilia mbali

makundi ya Thebesi.

¹⁶Nitaitia moto nchi ya Misri;

Pelusiumu itagaagaa kwa maumivu makuu.

Thebesi itachukuliwa na tufani,

Memfisi itakuwa katika taabu daima.

¹⁷Wanaume vijana wa Oni na wa Pi-Besethi[#30:17 yaani Heliopoli ( Mji wa Jua ); #30:17 yaani Bubasti]

wataanguka kwa upanga

nayo hiyo miji itatekwa.

¹⁸Huko Tapanesi mchana utatiwa giza

nitakapovunja nira ya Misri;

hapo kiburi cha nguvu zake kitakoma.

Atafunikwa na mawingu

na vijiji vyake vitatekwa.

¹⁹Kwa hiyo nitaipiga Misri kwa adhabu,

nao watajua kuwa Mimi ndimi Bwana .’ ”

²⁰Katika mwaka wa kumi na moja, mwezi wa kwanza, siku ya saba, neno la Bwana likanijia kusema:

²¹“Mwanadamu, nimevunja mkono wa Farao mfalme wa Misri. Haukufungwa ili upone au kuwekewa kipande cha ubao ili upate nguvu za kuweza kuchukua upanga.

²²Kwa hiyo hili ndilo asemalo Bwana Mwenyezi: Mimi ni kinyume na Farao mfalme wa Misri. Nitavunja mikono yake yote miwili, ule mkono ulio mzima pia na ule uliovunjika na kuufanya upanga uanguke toka mkononi mwake.

²³Nitawatawanya Wamisri miongoni mwa mataifa na kuwatapanya katika nchi zote.

²⁴Nitaitia nguvu mikono ya mfalme wa Babeli na kuutia upanga wangu mkononi mwake, lakini nitavunja mikono ya Farao, naye atalia kwa huzuni mbele yake kama mtu aliyetiwa jeraha la kumfisha.

²⁵Nitaitia nguvu mikono ya mfalme wa Babeli, lakini mikono ya Farao italegea. Ndipo watajua kuwa Mimi ndimi Bwana , nitakapoutia upanga wangu mkononi mwa mfalme wa Babeli, naye ataunyoosha dhidi ya Misri.

²⁶Nitawatawanya Wamisri miongoni mwa mataifa na kuwatapanya katika nchi nyingine. Ndipo watajua kuwa Mimi ndimi Bwana .”