Kuzaliwa kwa Isaka

¹Wakati huu Bwana akamrehemu Sara kama alivyokuwa amesema, na Bwana akamtendea Sara kama alivyoahidi.

²Sara akapata mimba, na akamzalia Abrahamu mwana katika uzee wake, katika majira yale Mungu alikuwa amemwahidi.

³Abrahamu akampa huyo mwana ambaye Sara alimzalia jina Isaka.[#21:3 maana yake Kicheko au Anacheka]

⁴Isaka alipokuwa na umri wa siku nane, Abrahamu akamtahiri, kama Mungu alivyomwamuru.

⁵Abrahamu alikuwa na umri wa miaka mia moja Isaka mwanawe alipozaliwa.

⁶Sara akasema, “Mungu ameniletea kicheko, na kila mmoja atakayesikia jambo hili atacheka pamoja nami.”

⁷Akaongeza kusema, “Nani angemwambia Abrahamu kuwa Sara angenyonyesha watoto? Lakini nimemzalia mwana katika uzee wake.”

Hajiri na Ishmaeli wafukuzwa

⁸Mtoto akakua na akaachishwa kunyonya. Siku ile Isaka aliyoachishwa kunyonya, Abrahamu alifanya sherehe kubwa.

⁹Lakini Sara aliona kuwa mwana ambaye Hajiri Mmisri alimzalia Abrahamu alikuwa anadhihaki.

¹⁰Hivyo Sara akamwambia Abrahamu, “Mwondoe mjakazi huyu mtumwa pamoja na mwanawe, kwa kuwa mwana wa mjakazi huyo kamwe hatarithi na mwanangu Isaka.”

¹¹Jambo hili lilimhuzunisha sana Abrahamu kwa sababu lilimhusu mwanawe.

¹²Lakini Mungu akamwambia, “Usihuzunike hivyo kwa sababu ya kijana huyo na mjakazi wako. Sikiliza lolote Sara analokuambia, kwa sababu uzao wako utahesabiwa kupitia kwake Isaka.

¹³Nitamfanya huyu mwana wa mjakazi wako kuwa taifa pia, kwa sababu naye ni uzao wako.”

¹⁴Kesho yake asubuhi na mapema, Abrahamu akachukua chakula na kiriba cha maji, akampa Hajiri. Akaviweka begani mwa Hajiri, akamwondoa pamoja na kijana. Hajiri akashika njia, akatangatanga katika jangwa la Beer-Sheba.

¹⁵Maji yalipokwisha kwenye kiriba, Hajiri akamwacha kijana chini ya kichaka.

¹⁶Kisha akaenda akaketi kama umbali wa kutupa mshale, akawaza, “Siwezi kumwangalia kijana akifa.” Akiwa ameketi pale, akaanza kulia kwa huzuni.

¹⁷Mungu akamsikia kijana akilia. Malaika wa Mungu akamwita Hajiri kutoka mbinguni na kumwambia, “Kuna nini, Hajiri? Usiogope, Mungu amesikia kijana akilia akiwa amelala pale.

¹⁸Mwinue kijana na umshike mkono, kwa maana nitamfanya kuwa taifa kubwa.”

¹⁹Ndipo Mungu akamfumbua Hajiri macho, akaona kisima cha maji. Hivyo akaenda akajaza kiriba maji na kumpa kijana anywe.

²⁰Mungu akawa pamoja na huyo kijana alipokuwa akiendelea kukua. Aliishi jangwani na akawa mpiga upinde.

²¹Alipokuwa akiishi katika Jangwa la Parani, mama yake akamtwalia mke kutoka Misri.

Mapatano katika Beer-Sheba

²²Wakati huo Abimeleki na Fikoli mkuu wa majeshi yake wakamwambia Abrahamu, “Mungu yu pamoja nawe katika kila kitu unachofanya.

²³Sasa niapie hapa mbele za Mungu kwamba hutanitenda hila mimi, watoto wangu wala wazao wangu. Nitendee mimi na nchi ambayo unaishi kama mgeni wema ule ule ambao nimekutendea.”

²⁴Abrahamu akasema, “Ninaapa hivyo.”

²⁵Ndipo Abrahamu akalalamika kwa Abimeleki kuhusu kisima cha maji ambacho watumishi wa Abimeleki walikuwa wamemnyangʼanya.

²⁶Lakini Abimeleki akasema, “Sijui ni nani ametenda hili. Hukuniambia, leo tu ndipo ninasikia habari zake.”

²⁷Hivyo Abrahamu akaleta kondoo na ngʼombe, akampa Abimeleki, nao watu hawa wawili wakafanya mapatano.

²⁸Abrahamu akatenga kondoo jike saba kutoka kwa kundi.

²⁹Abimeleki akamuuliza Abrahamu, “Ni nini maana ya hawa kondoo jike saba uliowatenga peke yao?”

³⁰Abrahamu akamjibu, “Pokea hawa kondoo jike saba kutoka mkononi mwangu kama ushahidi kuwa nilichimba kisima hiki.”

³¹Hivyo mahali pale pakaitwa Beer-Sheba, kwa sababu watu hao wawili waliapiana hapo.

³²Baada ya mapatano kufanyika huko Beer-Sheba, Abimeleki na Fikoli mkuu wa majeshi yake wakarudi nchi ya Wafilisti.

³³Abrahamu akapanda mti wa mkwaju huko Beer-Sheba, na hapo akaliitia jina la Bwana , Mungu wa milele.

³⁴Naye Abrahamu akakaa nchi ya Wafilisti kwa muda mrefu.