Kurejeshwa kwa Israeli

¹Hili ndilo neno lililomjia Yeremia kutoka kwa Bwana :

²“Hili ndilo asemalo Bwana , Mungu wa Israeli: ‘Andika katika kitabu maneno yote niliyonena na wewe.

³Siku zinakuja,’ asema Bwana , ‘nitakapowaleta watu wangu Israeli na Yuda kutoka uhamishoni, na kuwarudisha katika nchi niliyowapa baba zao ili kuimiliki,’ asema Bwana .”

⁴Haya ndio maneno aliyoyanena Bwana kuhusu Israeli na Yuda:

⁵“Hili ndilo asemalo Bwana :

“ ‘Vilio vya woga vinasikika:

hofu kuu, wala si amani.

⁶Ulizeni na mkaone:

Je, mwanaume aweza kuzaa watoto?

Kwa nini basi ninaona kila mwanaume mwenye nguvu

ameweka mikono yake tumboni

kama mwanamke aliye na uchungu wa kuzaa,

kila uso ukigeuka rangi kabisa?

⁷Ole! Kwa kuwa siku ile itakuwa ya kutisha.

Hakutakuwa na nyingine kama hiyo.

Utakuwa wakati wa dhiki kwa Yakobo,

lakini ataokolewa kutoka dhiki hiyo.

⁸“ ‘Katika siku ile,’ asema Bwana wa majeshi,

‘nitaivunja nira kutoka shingoni mwao

na kuvipasua vifungo vyao;

wageni hawatawafanya tena watumwa.

⁹Badala yake, watamtumikia Bwana Mungu wao

na Daudi mfalme wao,

nitakayemwinua kwa ajili yao.

¹⁰“ ‘Hivyo usiogope, ee Yakobo mtumishi wangu,

usifadhaike, ee Israeli,’

asema Bwana .

‘Hakika, nitakuokoa kutoka mbali,

wazao wako kutoka nchi ya uhamisho wao.

Yakobo atakuwa tena na amani na usalama,

wala hakuna atakayemtia hofu.

¹¹Mimi niko pamoja nawe, nami nitakuokoa,’

asema Bwana .

‘Ingawa nitayaangamiza kabisa mataifa yote

nilikokuwa nimewatawanya,

sitawaangamiza ninyi kabisa.

Nitawaadhibu, lakini kwa haki.

Sitawaacha kabisa bila adhabu.’

¹²“Hili ndilo asemalo Bwana :

“ ‘Kidonda chako hakina dawa,

jeraha lako haliponyeki.

¹³Hakuna yeyote wa kukutetea katika shauri lako,

hakuna dawa ya kidonda chako,

wewe hutapona.

¹⁴Wale walioungana nawe wote wamekusahau,

hawajali chochote kukuhusu wewe.

Nimekupiga vile adui angekupiga,

na kukuadhibu vile mtu mkatili angekuadhibu,

kwa sababu hatia yako ni kubwa mno,

na dhambi zako ni nyingi sana.

¹⁵Kwa nini unalia kwa ajili ya jeraha lako,

yale maumivu yako yasiyoponyeka?

Kwa sababu ya uovu wako mkubwa na dhambi zako nyingi

nimekufanyia mambo haya.

¹⁶“ ‘Lakini watu wote wakuangamizao wataangamizwa;

adui zako wote wataenda uhamishoni.

Wale wote wakutekao nyara watatekwa nyara;

wote wakufanyao mateka nitawafanya mateka.

¹⁷Lakini nitakurudishia afya yako

na kuyaponya majeraha yako,’

asema Bwana ,

‘kwa sababu umeitwa mwenye kutupwa,

Sayuni ambaye hakuna yeyote anayekujali.’

¹⁸“Hili ndilo asemalo Bwana :

“ ‘Nitarudisha baraka za mahema ya Yakobo,

na kuhurumia maskani zake.

Mji utajengwa tena juu ya magofu yake,

nalo jumba la kifalme litasimama mahali pake halisi.

¹⁹Nyimbo za kushukuru zitatoka kwao

na sauti ya furaha.

Nitaiongeza idadi yao

wala hawatapungua,

nitawapa heshima

na hawatadharauliwa.

²⁰Watoto wao watakuwa kama walivyokuwa

siku za zamani,

nayo jumuiya yao itaimarishwa mbele yangu;

nitawaadhibu wote wanaowadhulumu.

²¹Mmoja wao atakuwa kiongozi wao;

mtawala wao atainuka miongoni mwao.

Nitamleta karibu nami,

naye atanikaribia mimi,

kwa maana ni nani yule atakayejitolea

kuwa karibu nami?’

asema Bwana .

²²‘Kwa hiyo ninyi mtakuwa watu wangu,

nami nitakuwa Mungu wenu.’ ”

²³Tazama, tufani ya Bwana

italipuka kwa ghadhabu,

upepo wa kisulisuli uendao kasi

utashuka juu ya vichwa vya waovu.

²⁴Hasira kali ya Bwana haitarudi nyuma

hadi atakapotimiza makusudi yote ya moyo wake.

Siku zijazo

mtayaelewa haya.