Mchungaji mwema

¹“Amin, amin nawaambia, yeye asiyeingia katika zizi la kondoo kupitia kwenye lango, lakini akwea kuingia ndani kwa njia nyingine, huyo ni mwizi na mnyangʼanyi.

²Yeye anayeingia kupitia kwenye lango ndiye mchungaji wa kondoo.

³Mlinzi humfungulia lango, na kondoo huisikia sauti yake. Yeye huwaita kondoo wake kwa majina yao na kuwatoa nje ya zizi.

⁴Baada ya kuwatoa wote nje, yeye hutangulia mbele yao na kondoo humfuata, kwa kuwa wanaijua sauti yake.

⁵Lakini kondoo hawatamfuata mgeni, bali watamkimbia kwa sababu hawaijui sauti ya mgeni.”

⁶Yesu alitumia mfano huu, lakini wao hawakuelewa hayo aliyokuwa akiwaambia.

⁷Kwa hiyo Yesu akasema nao tena, akawaambia, “Amin, amin nawaambia, mimi ndimi lango la kondoo.

⁸Wote walionitangulia ni wezi na wanyangʼanyi, nao kondoo hawakuwasikia.

⁹Mimi ndimi lango. Yeyote anayeingia zizini kupitia kwangu ataokoka. Ataingia na kutoka, naye atapata malisho.

¹⁰Mwizi huja ili aibe, aue na aangamize. Mimi nimekuja ili wapate uzima, kisha wawe nao tele.

¹¹“Mimi ndimi mchungaji mwema. Mchungaji mwema huutoa uhai wake kwa ajili ya kondoo.

¹²Mtu wa kuajiriwa sio mchungaji mwenye kondoo. Anapomwona mbwa-mwitu akija, yeye hukimbia na kuwaacha kondoo. Naye mbwa-mwitu hulishambulia kundi na kulitawanya.

¹³Yeye hukimbia kwa sababu ameajiriwa wala hawajali kondoo.

¹⁴“Mimi ndimi mchungaji mwema. Ninawajua kondoo wangu, nao kondoo wangu wananijua.

¹⁵Kama vile Baba anavyonijua mimi, nami ninavyomjua Baba, ndivyo nami ninautoa uhai wangu kwa ajili ya kondoo.

¹⁶Ninao kondoo wengine ambao si wa zizi hili. Inanipasa kuwaleta, nao wataisikia sauti yangu; hivyo patakuwa na kundi moja na mchungaji mmoja.

¹⁷Baba yangu ananipenda kwa kuwa ninautoa uhai wangu ili niupate tena.

¹⁸Hakuna mtu aniondoleaye uhai wangu, bali ninautoa kwa hiari yangu mwenyewe. Ninao uwezo wa kuutoa uhai wangu, na pia ninao uwezo wa kuutwaa tena. Amri hii nimepewa na Baba yangu.”

¹⁹Waliposikia maneno haya, Wayahudi wakagawanyika.

²⁰Wengi wao wakasema, “Huyu amepagawa na pepo mchafu, naye amechanganyikiwa.”

²¹Wengine wakasema, “Haya si maneno ya mtu aliyepagawa na pepo mchafu. Je, pepo mchafu aweza kufungua macho ya kipofu?”

Yesu akataliwa na Wayahudi

²²Ikafika Sikukuu ya Kuwekwa wakfu kwa Hekalu huko Yerusalemu. Ilikuwa majira ya baridi.[#10:22 yaani Hanukkah kwa Kiebrania]

²³Naye Yesu alikuwa akitembea ndani ya Hekalu katika Ukumbi wa Sulemani.

²⁴Wayahudi wakamkusanyikia, wakamuuliza, “Utatuweka katika hali ya mashaka hadi lini? Kama wewe ndiwe Kristo, tuambie waziwazi.”[#10:24 maana yake Masiya , yaani Aliyetiwa mafuta.]

²⁵Yesu akawajibu, “Nimewaambia, lakini hamwamini. Mambo ninayoyatenda kwa jina la Baba yangu yananishuhudia.

²⁶Lakini hamwamini, kwa sababu ninyi si wa kundi la kondoo wangu.

²⁷Kondoo wangu huisikia sauti yangu nami nawajua, nao hunifuata.

²⁸Nami ninawapa uzima wa milele; hawataangamia kamwe, wala hakuna mtu atakayewapokonya kutoka mikono yangu.

²⁹Baba yangu aliyenipa hawa ni mkuu kuliko wote, na hakuna awezaye kuwapokonya kutoka mikononi mwake.

³⁰Mimi na Baba yangu tu umoja.”

³¹Kwa mara nyingine Wayahudi wakainua mawe ili wampige nayo,

³²lakini Yesu akawaambia, “Nimewaonesha miujiza mingi mikubwa kutoka kwa Baba yangu. Ni kwa ipi kati ya hiyo miujiza mnataka kunipiga mawe?”

³³Wayahudi wakamjibu, “Hatukupigi mawe kwa sababu ya mambo mema uliyotenda, bali ni kwa kuwa umekufuru. Ingawa wewe ni mwanadamu, unajifanya kuwa Mungu.”

³⁴Yesu akawajibu, “Je, haikuandikwa katika Sheria yenu kwamba, ‘Nimesema kuwa ninyi ni “miungu”’?[#10:34 Za 82:6]

³⁵Kama aliwaita ‘miungu’ wale ambao neno la Mungu liliwafikia, nayo Maandiko hayawezi kutanguka,

³⁶je, mwawezaje kusema kwamba yule ambaye Baba amemweka wakfu na kumtuma ulimwenguni anakufuru, kwa sababu nilisema, ‘Mimi ni Mwana wa Mungu’?

³⁷Ikiwa sifanyi kazi za Baba yangu, basi msiniamini.

³⁸Lakini ikiwa nazifanya kazi za Mungu, hata kama hamniamini mimi ziaminini hizo kazi, ili mpate kujua na kuelewa kwamba Baba yu ndani yangu, nami ni ndani yake.”

³⁹Ndipo wakajaribu kumkamata kwa mara nyingine, lakini akaponyoka kutoka mikononi mwao.

⁴⁰Yesu akaenda tena ngʼambo ya Yordani hadi mahali Yohana alikuwa akibatiza hapo awali, naye akakaa huko.

⁴¹Watu wengi wakamjia, nao wakawa wakisema, “Yohana hakufanya muujiza wowote, lakini kila jambo alilosema kumhusu huyu mtu ni kweli.”

⁴²Nao watu wengi wakamwamini Yesu huko.