Yesu akamilisha huduma yake

Kifo cha Lazaro

¹Basi mtu mmoja, jina lake Lazaro, alikuwa mgonjwa. Yeye alikuwa akiishi Bethania, kijiji cha Mariamu na Martha dada yake.

²(Huyu Mariamu, ambaye Lazaro kaka yake alikuwa mgonjwa, ndiye alimpaka Bwana mafuta na kuifuta miguu yake kwa nywele zake.)

³Hivyo hawa dada wawili walituma ujumbe kwa Yesu kumwambia, “Bwana, yule umpendaye ni mgonjwa.”

⁴Lakini Yesu aliposikia hayo, akasema, “Ugonjwa huu hautaleta mauti, bali ni wa kudhihirisha utukufu wa Mungu, ili Mwana wa Mungu apate kutukuzwa kutokana na ugonjwa huu.”

⁵Yesu aliwapenda Martha, Mariamu na Lazaro ndugu yao.

⁶Hata hivyo, baada ya kusikia kwamba Lazaro ni mgonjwa, alikawia huko alikokuwa kwa siku mbili zaidi.

⁷Ndipo akawaambia wanafunzi wake, “Haya, turudi Yudea.”

⁸Wanafunzi wake wakamwambia, “Rabi, Wayahudi walikuwa wanataka kukupiga mawe, nawe unataka kurudi huko?”

⁹Yesu akawajibu, “Si kuna saa kumi na mbili za mchana katika siku moja? Wanaotembea mchana hawawezi kujikwaa, kwa maana wanaona kwa nuru ya ulimwengu huu.

¹⁰Lakini wale wanaotembea usiku hujikwaa kwa sababu hawana nuru ndani yao.”

¹¹Baada ya kusema haya, Yesu akawaambia, “Rafiki yetu Lazaro amelala, lakini naenda kumwamsha.”

¹²Wanafunzi wakamwambia, “Bwana, kama amelala usingizi ataamka.”

¹³Hata hivyo, Yesu alikuwa anazungumzia kuwa Lazaro amekufa, lakini wanafunzi wake hawakuelewa, walidhani kwamba anasema Lazaro amelala usingizi tu.

¹⁴Kwa hiyo Yesu akawaambia waziwazi, “Lazaro amekufa.

¹⁵Hata hivyo nafurahi kwa kuwa sikuwako huko kabla ya Lazaro kufa, ili mpate kuamini. Lakini sasa twendeni kwake.”

¹⁶Tomaso (aliyeitwa Pacha) akawaambia wanafunzi wenzake, “Sisi nasi twendeni tukafe pamoja naye.”

Yesu ndiye ufufuo na uzima

¹⁷Yesu alipowasili huko alikuta Lazaro amekuwa kaburini siku nne.

¹⁸Basi Bethania ulikuwa karibu na Yerusalemu, umbali wa yamkini maili mbili,[#11:18 kama kilomita 3]

¹⁹na Wayahudi wengi walikuwa wamekuja kuwafariji Martha na Mariamu kwa ajili ya kufiwa na ndugu yao.

²⁰Martha aliposikia kwamba Yesu anakuja, alitoka kwenda kumlaki, ila Mariamu alibaki nyumbani.

²¹Martha akamwambia Yesu, “Bwana, kama ungekuwa hapa, ndugu yangu hangekufa.

²²Lakini sasa ninajua kuwa chochote utakachomwomba Mungu, atakupa.”

²³Yesu akamwambia, “Ndugu yako atafufuka.”

²⁴Martha akamjibu, “Ninajua ya kuwa atafufuka wakati wa ufufuo wa wafu siku ya mwisho.”

²⁵Yesu akamwambia, “Mimi ndiye huo ufufuo na uzima. Yeye aniaminiye mimi, hata akifa atakuwa anaishi;

²⁶na yeyote aishiye na kuniamini hatakufa kabisa hata milele. Je, unasadiki haya?”

²⁷Martha akamwambia, “Ndiyo Bwana, ninaamini ya kuwa wewe ndiwe Kristo, Mwana wa Mungu, yeye ajaye ulimwenguni.”[#11:27 maana yake Masiya , yaani Aliyetiwa mafuta.]

Yesu alia

²⁸Baada ya kusema haya, Martha alienda akamwita Mariamu dada yake faraghani na kumwambia, “Mwalimu yuko hapa anakuita.”

²⁹Mariamu aliposikia hivyo, akaondoka upesi, akaenda hadi alipokuwa Yesu.

³⁰Yesu alikuwa hajaingia kijijini, bali alikuwa bado yuko mahali pale alipokutana na Martha.

³¹Wale Wayahudi waliokuwa pamoja na Mariamu nyumbani wakimfariji walipoona ameondoka haraka na kutoka nje, walimfuata wakidhani kwamba alikuwa anaenda kule kaburini kulilia huko.

³²Mariamu alipofika mahali pale Yesu alipokuwa, alipiga magoti miguuni pake na kusema, “Bwana, kama ungekuwa hapa, ndugu yangu hangekufa.”

³³Yesu alipomwona Mariamu akilia na wale Wayahudi waliokuja pamoja naye pia wakilia, Yesu alisikia uchungu moyoni, akafadhaika sana.

³⁴Akauliza, “Mmemweka wapi?”

Wakamwambia, “Bwana, njoo upaone.”

³⁵Yesu akalia machozi.

³⁶Ndipo Wayahudi wakasema, “Tazama jinsi alivyompenda Lazaro!”

³⁷Lakini wengine wakasema, “Je, yule aliyefungua macho ya kipofu, hakuweza kumfanya na huyu asife?”

Yesu amfufua Lazaro

³⁸Yesu akafika penye kaburi akiwa amefadhaika sana kwa mara nyingine. Hilo kaburi lilikuwa pango ambalo jiwe liliwekwa kwenye ingilio lake.

³⁹Yesu akasema, “Liondoeni jiwe.”

Martha dada yake yule aliyekuwa amekufa akasema, “Lakini Bwana, wakati huu atakuwa ananuka kwani amekwisha kuwa kaburini siku nne.”

⁴⁰Yesu akamwambia, “Sikukuambia kwamba ukiamini utauona utukufu wa Mungu?”

⁴¹Kwa hiyo wakaliondoa lile jiwe kutoka kaburini. Yesu akainua macho yake juu, akasema, “Baba, ninakushukuru kwa kuwa wanisikia.

⁴²Ninajua ya kuwa wewe hunisikia siku zote, lakini nimesema haya kwa ajili ya watu hawa waliosimama hapa, ili wapate kuamini ya kuwa wewe umenituma.”

⁴³Baada ya kusema haya, Yesu akapaza sauti yake, akaita, “Lazaro, njoo huku!”

⁴⁴Yule aliyekuwa amekufa akatoka nje, mikono yake na miguu yake ikiwa imeviringishiwa vitambaa vya kitani na leso usoni pake.

Yesu akawaambia, “Mfungueni; mwacheni aende zake.”

Njama ya kumuua Yesu

⁴⁵Hivyo Wayahudi wengi waliokuwa wamekuja kumfariji Mariamu walipoona yale Yesu aliyoyatenda, wakamwamini.

⁴⁶Lakini baadhi yao wakaenda kwa Mafarisayo na kuwaambia mambo Yesu aliyoyafanya.

⁴⁷Kwa hiyo viongozi wa makuhani na Mafarisayo wakaita mkutano wa Baraza la Wayahudi.[#11:47 ina maana ya Sanhedrin ambalo lilikuwa baraza la juu kabisa la utawala wa Kiyahudi; liliundwa na wazee 70 pamoja na kuhani mkuu.]

Wakaulizana, “Tufanyeje? Huyu mtu anafanya ishara nyingi.

⁴⁸Tukimwacha aendelee hivi, kila mtu atamwamini, nao Warumi watakuja na kupaharibu mahali petu patakatifu na taifa letu.”

⁴⁹Mmoja wao aliyeitwa Kayafa, aliyekuwa kuhani mkuu mwaka huo, akasema, “Ninyi hamjui kitu chochote!

⁵⁰Hamjui kwamba ni afadhali mtu mmoja afe kwa ajili ya watu, kuliko taifa lote liangamie?”

⁵¹Hakusema haya kutokana na mawazo yake mwenyewe, bali kama kuhani mkuu mwaka huo, alitabiri kuwa Yesu angekufa kwa ajili ya taifa la Wayahudi;

⁵²wala si kwa ajili ya taifa hilo pekee, bali pia kwa ajili ya watoto wa Mungu waliotawanyika, ili kuwaleta pamoja na kuwafanya wawe wamoja.

⁵³Hivyo tangu siku hiyo wakawa wanafanya mipango ili wamuue Yesu.

⁵⁴Kwa hiyo Yesu akawa hatembei tena hadharani miongoni mwa Wayahudi, bali alijitenga akaenda sehemu iliyo karibu na jangwa kwenye kijiji kiitwacho Efraimu. Akakaa huko na wanafunzi wake.

⁵⁵Basi Pasaka ya Wayahudi ilipokuwa imekaribia, watu wengi walitoka vijijini wakaenda Yerusalemu ili wakajitakase kabla ya Pasaka.

⁵⁶Watu wakawa wanamtafuta Yesu, nao waliposimama kwenye ua la Hekalu, waliulizana, “Je, mtu huyu hatakuja kamwe kwenye Sikukuu?”

⁵⁷Viongozi wa makuhani na Mafarisayo walikuwa wametoa amri kuwa yeyote atakayejua mahali Yesu aliko, lazima atoe taarifa ili wapate kumkamata.