Yesu amponya mtu aliyezaliwa kipofu

¹Yesu alipokuwa akipita, akamwona mtu aliyekuwa kipofu tangu kuzaliwa.

²Wanafunzi wake wakamuuliza, “Rabi, ni nani aliyetenda dhambi; ni huyu mtu au wazazi wake hata azaliwe kipofu?”

³Yesu akawajibu, “Huyu mtu wala wazazi wake hawakutenda dhambi. Alizaliwa kipofu ili kazi za Mungu zidhihirishwe katika maisha yake.

⁴Yanipasa kuzifanya kazi zake yeye aliyenituma wakati bado ni mchana, kwa kuwa usiku waja ambapo hakuna mtu awezaye kufanya kazi.

⁵Wakati niko ulimwenguni, mimi ni nuru ya ulimwengu.”

⁶Baada ya kusema haya, akatema mate ardhini, akatengeneza tope kwa mate na kumpaka yule kipofu machoni.

⁷Kisha akamwambia, “Nenda ukanawe katika Bwawa la Siloamu” (Siloamu maana yake ni Kutumwa). Ndipo yule kipofu akaenda, akanawa, naye akarudi akiwa anaona.

⁸Majirani zake na wale wote waliokuwa wamemwona hapo awali akiombaomba wakaanza kuuliza, “Je, huyu si yule aliyekuwa akiketi akiombaomba?”

⁹Wengine wakasema, “Ndiye.”

Wengine wakasema, “Siye, bali anafanana naye.”

Lakini yeye akawaambia, “Mimi ndiye.”

¹⁰Wakamuuliza, “Basi macho yako yalifumbuliwaje?”

¹¹Yeye akawajibu, “Yule mtu aitwaye Yesu alitengeneza tope, akanipaka machoni mwangu, naye akaniambia, ‘Nenda ukanawe katika Bwawa la Siloamu,’ ndipo nikanawa nami nikapata kuona!”

¹²Wale wakamuuliza, “Yeye huyo mtu yuko wapi?”

Akawajibu, “Sijui.”

Mafarisayo wachunguza kuponywa kwa kipofu

¹³Wakamleta yule mtu aliyekuwa kipofu hapo awali kwa Mafarisayo.

¹⁴Basi siku hiyo Yesu alitengeneza tope na kuyafungua macho ya huyo mtu ilikuwa Sabato.

¹⁵Mafarisayo nao wakaanza kumuuliza yule mtu alivyopata kuona. Naye akawaambia, “Alinipaka tope kwenye macho yangu, nikanawa na sasa ninaona.”

¹⁶Baadhi ya Mafarisayo wakasema, “Huyu mtu hatoki kwa Mungu, kwa sababu hashiki Sabato.”

Lakini wengine wakasema, “Awezaje mtu mwenye dhambi kufanya miujiza kama hii?” Wakagawanyika.

¹⁷Hivyo wakamwambia tena yule mtu aliyekuwa kipofu, “Wewe ndiwe uliyefumbuliwa macho. Wasemaje kuhusu mtu huyo?”

Yeye akawajibu, “Yeye ni nabii.”

¹⁸Wale Wayahudi hawakuamini ya kuwa mtu huyo alikuwa kipofu akapata kuona, hadi walipowaita wazazi wake.

¹⁹Wakawauliza, “Je, huyu ni mtoto wenu, ambaye mnasema alizaliwa kipofu? Imekuwaje basi sasa anaona?”

²⁰Wazazi wake wakajibu, “Tunajua ya kuwa huyu ni mtoto wetu na ya kuwa alizaliwa kipofu.

²¹Lakini hatujui jinsi anavyoweza kuona sasa, wala hatujui ni nani aliyemfungua macho yake. Muulizeni; yeye ni mtu mzima na anaweza kujieleza mwenyewe.”

²²Wazazi wake walisema hivi kwa sababu waliwaogopa viongozi wa Wayahudi, kwani walikuwa wamekubaliana kuwa mtu yeyote atakayemkiri Yesu kuwa ndiye Kristo atafukuzwa kutoka sinagogi.[#9:22 maana yake Masiya , yaani Aliyetiwa mafuta.]

²³Kwa hiyo wazazi wake wakasema, “Yeye ni mtu mzima. Muulizeni.”

²⁴Hivyo kwa mara ya pili wakamwita yule aliyekuwa kipofu, nao wakamwambia, “Mpe Mungu utukufu! Sisi tunafahamu kuwa mtu huyu aliyekuponya ni mwenye dhambi.”

²⁵Akawajibu, “Mimi sijui kama yeye ni mwenye dhambi. Lakini jambo moja ninalojua, nilikuwa kipofu na sasa ninaona.”

²⁶Wakamuuliza, “Alikufanyia nini? Aliyafumbuaje macho yako?”

²⁷Akawajibu, “Tayari nimekwisha kuwaambia, nanyi hamtaki kunisikiliza. Mbona mnataka kusikia tena? Je, ninyi nanyi mnataka kuwa wanafunzi wake?”

²⁸Ndipo wakamtukana na kusema, “Wewe ndiwe mwanafunzi wake! Sisi ni wanafunzi wa Musa.

²⁹Tunajua kwamba Mungu alisema na Musa, lakini mtu huyu hatujui anakotoka.”

³⁰Yule mtu akawajibu, “Hili ni jambo la ajabu! Hamjui anakotoka, naye amenifungua macho yangu!

³¹Tunajua ya kuwa Mungu hawasikilizi wenye dhambi, lakini huwasikiliza wote wanaomcha na kumtii.

³²Tangu zamani hatujasikia kwamba mtu amemponya yeyote aliyezaliwa kipofu.

³³Kama huyu mtu hakutoka kwa Mungu, asingeweza kufanya lolote.”

³⁴Wakamjibu, “Wewe ulizaliwa katika dhambi kabisa, nawe unajaribu kutufundisha?” Wakamfukuza atoke nje.

Upofu wa kiroho

³⁵Yesu aliposikia kuwa wamemfukuza atoke nje yule mtu aliyemfumbua macho, alimkuta, akamuuliza, “Je, unamwamini Mwana wa Adamu?”

³⁶Yule mtu akamjibu, “Yeye ni nani, Bwana? Niambie ili nipate kumwamini.”

³⁷Yesu akamjibu, “Umekwisha kumwona; naye anayezungumza nawe, ndiye.”

³⁸Yule mtu akasema, “Bwana, naamini.” Naye akamwabudu.

³⁹Yesu akasema, “Nimekuja ulimwenguni humu kwa ajili ya kuhukumu, ili wale walio vipofu wapate kuona, nao wale wanaoona wawe vipofu.”

⁴⁰Baadhi ya Mafarisayo waliokuwa karibu naye wakamsikia na kumwambia, “Je, kweli sisi ni vipofu?”

⁴¹Yesu akawajibu, “Kama mngekuwa vipofu kweli, msingekuwa na hatia ya dhambi, lakini kwa kuwa mnasema, ‘Tunaona,’ basi mna hatia.