Mfano wa karamu ya arusi

¹Yesu akasema nao tena kwa mifano, akawaambia,

²“Ufalme wa mbinguni unaweza kufananishwa na mfalme mmoja aliyemwandalia mwanawe karamu ya arusi.

³Akawatuma watumishi wake kuwaita wale waliokuwa wamealikwa karamuni, lakini wakakataa kuja.

⁴“Kisha akawatuma watumishi wengine akisema, ‘Waambieni wale walioalikwa kwamba nimeandaa chakula. Nimekwisha kuchinja mafahali wangu na vinono, karamu iko tayari. Karibuni kwa karamu ya arusi.’

⁵“Lakini hawakuzingatia, wakaenda zao: huyu shambani mwake na mwingine kwenye biashara zake.

⁶Wengine wao wakawakamata wale watumishi wake, wakawatesa na kuwaua.

⁷Yule mfalme akakasirika sana, akapeleka jeshi lake likawaangamiza wale wauaji na kuuteketeza mji wao kwa moto.

⁸“Kisha akawaambia watumishi wake, ‘Karamu ya arusi imeshakuwa tayari, lakini wale niliowaalika hawakustahili kuja.

⁹Kwa hiyo nendeni katika njia panda mkamwalike karamuni yeyote mtakayemwona.’

¹⁰Wale watumishi wakaenda barabarani, wakawakusanya watu wote waliowaona, wema na wabaya. Ukumbi wa arusi ukajaa wageni.

¹¹“Lakini mfalme alipoingia ndani ili kuwaona wageni, akamwona mle mtu mmoja ambaye hakuwa amevaa vazi la arusi.

¹²Mfalme akamuuliza, ‘Rafiki, uliingiaje humu bila vazi la arusi?’ Yule mtu hakuwa na la kusema.

¹³“Ndipo mfalme akawaambia watumishi wake, ‘Mfungeni mikono na miguu mkamtupe nje, kwenye giza. Huko kutakuwa na kilio na kusaga meno.’

¹⁴“Kwa maana walioitwa ni wengi, lakini walioteuliwa ni wachache.”

Swali kuhusu kulipa kodi ya Kaisari

¹⁵Ndipo Mafarisayo wakatoka nje wakaandaa mpango wa kumtega Yesu katika maneno yake.

¹⁶Wakatuma wanafunzi wao pamoja na Maherode kwake. Nao wakasema, “Mwalimu, tunajua kwamba wewe ni mtu mwadilifu na unafundisha njia ya Mungu katika kweli bila kuyumbishwa na mtu wala kuonesha upendeleo.

¹⁷Tuambie basi, wewe unaonaje? Je, ni halali kulipa kodi kwa Kaisari, au la?”

¹⁸Lakini Yesu alifahamu kusudi lao mbaya, akawaambia, “Enyi wanafiki, kwa nini mnajaribu kunitega?

¹⁹Nionesheni hiyo sarafu inayotumika kwa kulipia kodi.” Wakamletea dinari.

²⁰Naye akawauliza, “Sura hii ni ya nani? Na maandishi haya ni ya nani?”

²¹Wakamjibu, “Ni vya Kaisari.”

Basi Yesu akawaambia, “Mpeni Kaisari kilicho cha Kaisari, naye Mungu mpeni kilicho cha Mungu.”

²²Waliposikia hili, wakashangaa. Hivyo wakamwacha, wakaenda zao.

Ndoa wakati wa ufufuo

²³Siku hiyo hiyo Masadukayo, wale wasemao kuwa hakuna ufufuo wa wafu, wakamjia Yesu na kumuuliza swali, wakisema,

²⁴“Mwalimu, Musa alisema, ‘Mtu akifa bila kuwa na watoto, ndugu yake inampasa amwoe huyo mjane ili ampatie watoto huyo nduguye aliyekufa.’

²⁵Basi palikuwa na ndugu saba miongoni mwetu. Yule wa kwanza akaoa mke, naye akafa, na kwa kuwa hakuwa na watoto, akamwachia nduguye yule mjane.

²⁶Ikatokea vivyo hivyo kwa yule ndugu wa pili, na wa tatu, hadi wote saba.

²⁷Hatimaye, yule mwanamke naye akafa.

²⁸Sasa basi, siku ya ufufuo, yeye atakuwa mke wa nani miongoni mwa wale ndugu saba, kwa kuwa wote walikuwa wamemwoa huyo mwanamke?”

²⁹Yesu akawajibu, “Mwapotoka kwa sababu hamjui Maandiko wala uweza wa Mungu.

³⁰Wakati wa ufufuo, watu hawataoa wala kuolewa, bali watakuwa kama malaika wa mbinguni.

³¹Lakini kuhusu ufufuo wa wafu, hamjasoma kile Mungu alichowaambia, kwamba,

³²‘Mimi ni Mungu wa Abrahamu, Mungu wa Isaka, na Mungu wa Yakobo’? Yeye si Mungu wa wafu, bali ni Mungu wa walio hai.”[#22:32 Kut 3:6]

³³Wale umati wa watu waliposikia hayo, walishangaa sana kwa mafundisho yake.

Amri kuu kuliko zote

³⁴Mafarisayo waliposikia kwamba Yesu alikuwa amewanyamazisha Masadukayo, Mafarisayo wakakusanyika pamoja.

³⁵Mmoja wao, mtaalamu wa sheria, akamuuliza swali ili kumjaribu, akisema,

³⁶“Mwalimu, ni amri ipi katika Sheria iliyo kuu kuliko zote?”

³⁷Yesu akamjibu, “ ‘Mpende Bwana Mungu wako kwa moyo wako wote na kwa roho yako yote na kwa akili zako zote.’[#22:37 Kum 6:5]

³⁸Hii ndiyo amri iliyo kuu, tena ni ya kwanza.

³⁹Nayo ya pili ni kama hiyo, nayo ni hii: ‘Mpende jirani yako kama nafsi yako.’[#22:39 Law 19:18]

⁴⁰Amri hizi mbili ndizo msingi wa Sheria na Manabii.”

Kristo ni Mwana wa nani?

⁴¹Mafarisayo wakiwa wamekusanyika pamoja, Yesu akawauliza,

⁴²“Mnaonaje kuhusu Kristo? Yeye ni mwana wa nani?”[#22:42 maana yake Masiya , yaani Aliyetiwa mafuta.]

Wakamjibu, “Yeye ni mwana wa Daudi.”

⁴³Akawaambia, “Inakuwaje basi kwamba Daudi, akinena kwa kuongozwa na Roho, anamwita Kristo ‘Bwana’? Kwa maana asema,

⁴⁴“ ‘Bwana alimwambia Bwana wangu:

“Keti mkono wangu wa kuume,

hadi nitakapowaweka adui zako

chini ya miguu yako.”’

⁴⁵Kama basi Daudi anamwita yeye ‘Bwana,’ awezaje kuwa mwanawe?”

⁴⁶Hakuna mtu aliyeweza kumjibu Yesu neno. Tena tangu siku hiyo hakuna aliyethubutu kumuuliza tena maswali.