¹Mipango ya moyoni ni ya mwanadamu,

bali jibu la ulimi hutoka kwa Bwana .

²Njia zote za mtu huonekana safi machoni pake mwenyewe,

bali makusudi hupimwa na Bwana .

³Mkabidhi Bwana lolote ufanyalo,

nayo mipango yako itafanikiwa.

⁴Bwana hufanya kila kitu kwa kusudi lake mwenyewe;

hata waovu kwa siku ya maangamizi.

⁵Bwana huwachukia sana wote wenye kiburi cha moyo.

Uwe na hakika kwa hili: Hawataepuka kuadhibiwa.

⁶Kwa upendo na uaminifu uovu huondolewa;

kwa kumcha Bwana mtu hujiepusha na ubaya.

⁷Njia za mtu zinapompendeza Bwana ,

huwafanya hata adui zake waishi naye kwa amani.

⁸Afadhali kitu kidogo pamoja na haki

kuliko mapato mengi pamoja na udhalimu.

⁹Moyo wa mtu huifikiri njia yake,

bali Bwana huelekeza hatua zake.

¹⁰Midomo ya mfalme huzungumza kwa hekima ya kiungu,

wala kinywa chake hakipotoshi haki.

¹¹Vipimo na mizani za halali hutoka kwa Bwana ;

mawe yote ya kupimia yaliyo katika mfuko ameyafanya yeye.

¹²Wafalme huchukia sana kutenda maovu,

kwa maana kiti cha ufalme hufanywa imara kupitia haki.

¹³Wafalme hufurahia midomo ya uaminifu;

humthamini mtu asemaye kweli.

¹⁴Ghadhabu ya mfalme ni mjumbe wa mauti,

bali mtu mwenye hekima ataituliza.

¹⁵Uso wa mfalme ungʼaapo, inamaanisha uhai;

upendeleo wake ni kama wingu la mvua wakati wa vuli.

¹⁶Ni bora kiasi gani kupata hekima kuliko dhahabu,

kuchagua ufahamu kuliko fedha!

¹⁷Njia kuu ya wanyofu huepuka ubaya;

yeye aichungaye njia yake, huchunga maisha yake.

¹⁸Kiburi hutangulia maangamizi,

roho ya majivuno hutangulia maanguko.

¹⁹Ni afadhali kuwa na roho ya unyenyekevu

miongoni mwa walioteswa

kuliko kugawana nyara na wenye kiburi.

²⁰Yeyote anayekubali mafundisho hustawi,

tena amebarikiwa yeye anayemtumaini Bwana .

²¹Wenye hekima moyoni huitwa wenye ufahamu,

na maneno ya kupendeza huchochea mafundisho.

²²Ufahamu ni chemchemi ya uzima kwa wale walio nao,

bali upumbavu huleta adhabu kwa wapumbavu.

²³Moyo wa mtu mwenye hekima huongoza kinywa chake,

na midomo yake huchochea mafundisho.

²⁴Maneno ya kupendeza ni kama sega la asali,

ni matamu kwa nafsi na uponyaji kwenye mifupa.

²⁵Iko njia ionekanayo kuwa sawa kwa mtu,

bali mwisho wake huelekeza mautini.

²⁶Shauku ya mfanyakazi humhimiza kufanya kazi;

njaa yake humsukuma aendelee.

²⁷Mtu mbaya kabisa hupanga mabaya,

maneno yake ni kama moto uunguzao.

²⁸Mtu mpotovu huchochea ugomvi,

nayo maongezi ya upuzi huwatenganisha rafiki wa karibu.

²⁹Mtu mkali humvuta jirani yake

na kumwongoza katika mapito yale mabaya.

³⁰Yeye akonyezaye kwa jicho lake anapanga upotovu;

naye akazaye midomo yake amenuia mabaya.

³¹Mvi ni taji la utukufu;

hupatikana kwa maisha ya uadilifu.

³²Ni afadhali mtu mstahimilivu kuliko shujaa,

mtu anayeitawala hasira yake kuliko yule autekaye mji.

³³Kura hupigwa kwa siri,

lakini kila uamuzi wake hutoka kwa Bwana .