¹Mtu ajitengaye na wengine

hufuata matakwa yake mwenyewe;

hupiga vita kila shauri jema.

²Mpumbavu hafurahii ufahamu,

bali hufurahia kutangaza

maoni yake mwenyewe.

³Uovu unapokuja, dharau huja pia;

pamoja na aibu huja lawama.

⁴Maneno ya kinywa cha mwanadamu ni kina cha maji,

bali chemchemi ya hekima ni kijito kinachobubujika.

⁵Sio vizuri kumpendelea mtu mwovu,

au kumnyima haki asiye na hatia.

⁶Midomo ya mpumbavu humletea ugomvi

na kinywa chake hualika kipigo.

⁷Kinywa cha mpumbavu ni uharibifu wake

na midomo yake ni mtego kwa nafsi yake.

⁸Maneno ya mchongezi ni kama chakula kitamu;

huingia sehemu za ndani sana za mtu.

⁹Mtu aliye mlegevu katika kazi yake

ni ndugu na yule anayeharibu.

¹⁰Jina la Bwana ni ngome imara,

wenye haki huikimbilia na kuwa salama.

¹¹Mali ya tajiri ni mji wake wenye ngome,

wanaudhania kuwa ukuta usioweza kurukwa.

¹²Kabla ya anguko moyo wa mtu hujaa kiburi,

bali unyenyekevu hutangulia heshima.

¹³Yeye ajibuye kabla ya kusikiliza,

huo ni upumbavu wake na aibu yake.

¹⁴Roho ya mtu itastahimili katika ugonjwa

bali roho iliyovunjika ni nani awezaye kuistahimili?

¹⁵Moyo wa mwenye ufahamu hujipatia maarifa,

masikio ya mwenye hekima huyatafuta maarifa.

¹⁶Zawadi humfungulia njia mtoaji,

nayo humleta mbele ya wakuu.

¹⁷Yeye aliye wa kwanza kuleta mashtaka huonekana sahihi,

hadi mwingine ajitokezapo na kumuuliza maswali.

¹⁸Kupiga kura hukomesha mashindano

na kutenganisha wapinzani wakuu wanaopingana.

¹⁹Ndugu aliyechukizwa ni mgumu kuridhika

kuliko mji uliozungushiwa ngome,

nayo mabishano ni kama malango

ya ngome yenye makomeo.

²⁰Tumbo la mtu litajaa kutokana na tunda la kinywa chake,

atashibishwa mavuno yanayotokana na midomo yake.

²¹Mauti na uzima viko katika uwezo wa ulimi,

nao wanaoupenda watakula matunda yake.

²²Mtu anayepata mke anapata kitu chema,

naye anajipatia kibali kwa Bwana .

²³Mtu maskini huomba kuhurumiwa

bali tajiri hujibu kwa ukali.

²⁴Mtu aliye na rafiki wasioaminika huangamia upesi,

bali yuko rafiki anayeambatana na mtu kwa karibu kuliko ndugu.