¹Afadhali mtu maskini ambaye mwenendo wake hauna lawama,

kuliko mpumbavu ambaye midomo yake imepotoka.

²Sio vizuri kuwa na juhudi bila maarifa,

wala kufanya haraka na kuikosa njia.

³Upumbavu wa mtu mwenyewe huharibu maisha yake

hata hivyo moyo wake humkasirikia Bwana .

⁴Mali huleta rafiki wengi,

bali rafiki wa mtu maskini humwacha.

⁵Shahidi wa uongo hataacha kuadhibiwa,

naye amwagaye uongo hataachwa huru.

⁶Wengi hujipendekeza kwa mtawala

na kila mmoja ni rafiki wa mtu atoaye zawadi.

⁷Mtu maskini huepukwa na ndugu zake wote:

Je, rafiki zake watamkwepa kiasi gani!

Ingawa huwafuata kwa kuwasihi,

hawapatikani popote.

⁸Yeye apataye hekima huipenda nafsi yake mwenyewe,

yeye ahifadhiye ufahamu hustawi.

⁹Shahidi wa uongo hataacha kuadhibiwa,

naye amwagaye uongo ataangamia.

¹⁰Haistahili mpumbavu kuishi katika anasa,

itakuwa vibaya kiasi gani

kwa mtumwa kuwatawala wakuu.

¹¹Hekima ya mtu humpa uvumilivu,

ni kwa utukufu wake kusamehe makosa.

¹²Ghadhabu ya mfalme ni kama mngurumo wa simba,

bali wema wake ni kama umande juu ya nyasi.

¹³Mwana mpumbavu ni maangamizi ya babaye,

naye mke mgomvi ni kama kutonatona kusikoisha.

¹⁴Nyumba na mali hurithiwa kutoka kwa wazazi,

bali mke mwenye busara hutoka kwa Bwana .

¹⁵Uvivu huleta usingizi mzito,

naye mtu mzembe huona njaa.

¹⁶Yeye ambaye hutii mafundisho huulinda uhai wake,

bali yeye anayezidharau njia zake atakufa.

¹⁷Yeye amhurumiaye maskini humkopesha Bwana ,

naye atamtuza kwa aliyotenda.

¹⁸Mkanye mwanao, kwa maana kufanya hivyo kuna tumaini,

usiwe mshirika katika mauti yake.

¹⁹Mtu mwenye kukasirika haraka ni lazima atapata adhabu yake,

kama utamwokoa, itakubidi kufanya hivyo tena.

²⁰Sikiliza mashauri na ukubali mafundisho,

nawe mwishoni utakuwa na hekima.

²¹Kuna mipango mingi ndani ya moyo wa mtu,

lakini kusudi la Bwana ndilo litakalosimama.

²²Lile mtu alionealo shauku ni upendo usio na mwisho,

afadhali kuwa maskini kuliko kuwa mwongo.

²³Kumcha Bwana huongoza kwenye uzima,

kisha mtu hupumzika akiwa ameridhika,

bila kuguswa na shida.

²⁴Mtu mvivu hutumbukiza mkono wake kwenye sahani,

lakini hawezi hata kuupeleka kwenye kinywa chake!

²⁵Mpige mwenye mzaha, naye mjinga atajifunza busara,

mkemee mwenye ufahamu naye atapata maarifa.

²⁶Yeye amwibiaye baba yake na kumfukuza mama yake

ni mwana aletaye aibu na fedheha.

²⁷Mwanangu, ukiacha kusikiliza mafundisho,

utatangatanga mbali na maneno ya maarifa.

²⁸Shahidi mla rushwa hudhihaki hukumu

na kinywa cha mtu mwovu humeza ubaya kwa upesi.

²⁹Adhabu zimeandaliwa kwa ajili ya wenye dhihaka

na mapigo kwa ajili ya migongo ya wapumbavu.