Faida za hekima

¹Mwanangu, kama utayakubali maneno yangu

na kuyaweka akiba maagizo yangu ndani mwako,

²kutega sikio lako kwenye hekima

na kuweka moyo wako katika ufahamu,

³na kama utaiita busara,

na kuita kwa sauti upate ufahamu,

⁴na ukiitafuta kama fedha

na kuitafuta sana kama hazina iliyofichwa,

⁵ndipo utakapoelewa kumcha Bwana

na kupata maarifa ya Mungu.

⁶Kwa maana Bwana hutoa hekima,

na kinywani mwake hutoka maarifa na ufahamu.

⁷Anahifadhi ushindi kwa ajili ya mwadilifu,

yeye ni ngao kwa wale wasio na lawama,

⁸kwa kuwa hulinda mwenendo wa mwenye haki

na kuhifadhi njia ya waaminifu wake.

⁹Ndipo utafahamu lipi lililo kweli na haki,

na sawa: yaani kila njia nzuri.

¹⁰Kwa maana hekima itaingia moyoni mwako,

nayo maarifa yataifurahisha nafsi yako.

¹¹Busara itakuhifadhi

na ufahamu utakulinda.

¹²Hekima itakuokoa kutoka njia za waovu,

kutoka kwa watu ambao maneno yao yamepotoka,

¹³wale wanaoacha mapito ya unyoofu,

wakatembea katika njia za giza,

¹⁴wale wanaopenda kutenda mabaya,

na kufurahia upotovu wa ubaya,

¹⁵ambao mapito yao yamepotoka,

na ambao ni wapotovu katika njia zao.

¹⁶Itakuokoa pia kutokana na mwanamke kahaba,

kutokana na mke aliyepotoka mwenye maneno

ya kushawishi kutenda ubaya,

¹⁷aliyemwacha mwenzi wa ujana wake

na kupuuza agano alilofanya mbele ya Mungu.

¹⁸Kwa maana nyumba yake huelekea kwenye kifo

na mapito yake kwenye roho za waliokufa.

¹⁹Hakuna yeyote aendaye kwake akarudi,

au kufikia mapito ya uzima.

²⁰Hivyo utatembea katika njia za watu wema

na kushikamana na mapito ya wenye haki.

²¹Kwa maana wanyofu wataishi katika nchi,

nao wasio na lawama watabakia ndani yake.

²²Bali waovu watakatiliwa mbali kutoka nchi,

nao wasio waaminifu watangʼolewa kutoka humo.