¹Heri kuchagua jina jema kuliko utajiri mwingi;

kuheshimiwa ni bora kuliko fedha au dhahabu.

²Tajiri na maskini wanafanana kwa hili:

Bwana ni Muumba wao wote.

³Mtu mwenye busara huona hatari na kujificha,

bali mjinga huendelea mbele, naye hupata madhara.

⁴Unyenyekevu na kumcha Bwana

huleta utajiri, heshima na uzima.

⁵Katika mapito ya waovu kuna miiba na mitego,

bali yeye ailindaye nafsi yake hukaa mbali nayo.

⁶Mfundishe mtoto njia impasayo kuiendea,

naye hataiacha hata akiwa mzee.

⁷Matajiri huwatawala maskini

naye akopaye ni mtumwa wa akopeshaye.

⁸Yeye aupandaye uovu huvuna taabu,

nayo fimbo ya ghadhabu yake itaangamizwa.

⁹Mtu mkarimu yeye mwenyewe atabarikiwa

kwa kuwa hushiriki chakula chake na maskini.

¹⁰Mfukuze mwenye dhihaka,

na mvutano utatoweka;

ugomvi na matukano vitakoma.

¹¹Yeye apendaye moyo safi na yeye ambaye maneno yake ni ya neema,

mfalme atakuwa rafiki yake.

¹²Macho ya Bwana hulinda maarifa,

bali huyapinga maneno ya asiye mwaminifu.

¹³Mvivu husema, “Yuko simba nje!”

au, “Nitauawa katika mitaa!”

¹⁴Kinywa cha mwanamke kahaba ni shimo refu;

yeye aliye chini ya ghadhabu ya Bwana

atatumbukia ndani yake.

¹⁵Upumbavu umefungwa ndani ya moyo wa mtoto,

bali fimbo ya adhabu itaufukuzia mbali naye.

¹⁶Yeye anayemdhulumu maskini ili kujiongezea mali,

naye anayempa tajiri zawadi, wote huwa maskini.

Misemo thelathini ya wenye hekima

¹⁷Tega sikio na usikie misemo ya wenye hekima,

elekeza moyo wako kwenye yale nifundishayo,

¹⁸kwa maana inapendeza unapoyahifadhi moyoni mwako

na kuwa nayo yote tayari mdomoni mwako.

¹⁹Ili tumaini lako liwe katika Bwana ,

hata wewe, ninakufundisha leo.

²⁰Je, sijakuandikia misemo thelathini,

misemo ya mashauri na maarifa,

²¹kukufundisha maneno ya kweli na ya kuaminika,

ili uweze kutoa majibu sahihi

kwake yeye aliyekutuma?

²²Usiwadhulumu maskini kwa sababu ni maskini,

wala kumdhulumu mhitaji mahakamani,

²³kwa sababu Bwana atawatetea

naye atawateka hao waliowateka.

²⁴Usifanye urafiki na mtu mwenye hasira ya haraka,

usishirikiane na yule aliye mwepesi kukasirika,

²⁵la sivyo utajifunza njia zake

na kujiingiza mwenyewe kwenye mtego.

²⁶Usiwe mwenye kupeana mikono katika rehani,

au kuweka dhamana kwa ajili ya madeni;

²⁷ukikosa njia ya kulipa,

kitanda chako kitachukuliwa

ukiwa umekilalia.

²⁸Usisogeze jiwe la mpaka wa zamani

lililowekwa na baba zako.

²⁹Je, unamwona mtu stadi katika kazi yake?

Atahudumu mbele ya wafalme;

hatahudumu mbele ya watu duni.