¹Uketipo kula chakula na mtawala,

angalia vyema kile kilicho mbele yako,

²na utie kisu kooni mwako

kama ukiwa mlafi.

³Usitamani vyakula vyake vitamu

kwa kuwa chakula hicho ni cha hila.

⁴Usijitaabishe ili kuupata utajiri,

uwe na hekima kuonesha kujizuia.

⁵Kufumba na kufumbua utajiri hutoweka,

huwa kama umepata mabawa ghafula,

ukaruka na kutoweka angani kama tai.

⁶Usile chakula cha mtu mchoyo,

usitamani vyakula vyake vitamu,

⁷kwa maana yeye ni aina ya mtu

ambaye kila mara anafikiri kuhusu gharama.

Anakuambia, “Kula na kunywa,”

lakini moyo wake hauko pamoja nawe.

⁸Utatapika kile kidogo ulichokula,

nawe utakuwa umepoteza bure

maneno yako ya kumsifu.

⁹Usizungumze na mpumbavu,

kwa maana atadhihaki hekima ya maneno yako.

¹⁰Usisogeze jiwe la mpaka wa zamani

wala kunyemelea kwenye mashamba ya yatima,

¹¹kwa kuwa Mtetezi wao ni mwenye nguvu,

atawatetea dhidi yako.

¹²Elekeza moyo wako kwenye mafundisho

na masikio yako kwenye maneno ya maarifa.

¹³Usimnyime mtoto adhabu,

ukimwadhibu kwa fimbo, hatakufa.

¹⁴Mwadhibu kwa fimbo

na kuiokoa nafsi yake kutoka mautini.

¹⁵Mwanangu, kama moyo wako una hekima,

basi moyo wangu utafurahi,

¹⁶utu wangu wa ndani utafurahi,

wakati midomo yako

itakapozungumza lililo sawa.

¹⁷Usiuruhusu moyo wako kuwaonea wivu wenye dhambi,

bali kila mara uwe na bidii katika kumcha Bwana .

¹⁸Hakika kuna tumaini la baadaye kwa ajili yako,

nalo tarajio lako halitakatiliwa mbali.

¹⁹Sikiliza, mwanangu na uwe na hekima,

weka moyo wako kwenye njia iliyo sawa.

²⁰Usiwe miongoni mwa wanywao mvinyo,

au wale walao nyama kwa pupa,

²¹kwa maana walevi na walafi huwa maskini,

nako kusinzia huwavika matambara.

²²Msikilize baba yako, aliyekuzaa,

wala usimdharau mama yako atakapokuwa mzee.

²³Nunua kweli wala usiiuze,

pata hekima, adabu na ufahamu.

²⁴Baba wa mwenye haki ana furaha kubwa,

naye aliye na mwana mwenye hekima humfurahia.

²⁵Baba yako na mama yako na wafurahi,

mama aliyekuzaa na ashangilie!

²⁶Mwanangu, nipe moyo wako,

macho yako na yafuate njia zangu,

²⁷kwa maana kahaba ni shimo refu

na mwanamke mpotovu ni kisima chembamba.

²⁸Kama mnyangʼanyi, hungojea akivizia,

naye huzidisha wasio waaminifu miongoni mwa wanaume.

²⁹Ni nani mwenye ole?

Ni nani mwenye huzuni?

Ni nani mwenye ugomvi?

Ni nani mwenye malalamiko?

Ni nani aliye na majeraha yasiyo na sababu?

Ni nani mwenye macho mekundu?

³⁰Ni hao wanaokaa sana kwenye mvinyo,

hao wanaoenda kuonja mabakuli ya mvinyo uliochanganywa.

³¹Usiukodolee macho mvinyo ukiwa mwekundu,

unapometameta kwenye bilauri,

unaposhuka taratibu!

³²Mwishowe huuma kama nyoka

na kutia sumu yake kama nyoka mwenye sumu.

³³Macho yako yataona mambo mageni,

na moyo wako kuwazia mambo yaliyopotoka.

³⁴Utakuwa kama alalaye baharini,

alalaye juu ya kamba ya merikebu.

³⁵Utasema, “Wamenipiga lakini sikuumia!

Wamenichapa, lakini sisikii!

Nitaamka lini

ili nikanywe tena?”