Zaburi 86

Kuomba msaada

¹Ee Bwana , sikia na unijibu,

kwa maana mimi ni maskini na mhitaji.

²Linda maisha yangu, kwa maana nimejiweka kwako,

wewe ni Mungu wangu,

mwokoe mtumishi wako anayekutumaini.

³Ee Bwana, nihurumie mimi,

kwa maana ninakuita mchana kutwa.

⁴Mpe mtumishi wako furaha,

kwa kuwa kwako wewe, Ee Bwana,

ninainua nafsi yangu.

⁵Ee Bwana, wewe ni mwema na mwenye kusamehe,

umejaa upendo kwa wote wakuitao.

⁶Ee Bwana , sikia maombi yangu,

sikiliza kilio changu unihurumie.

⁷Katika siku ya shida yangu nitakuita,

kwa maana wewe utanijibu.

⁸Ee Bwana, katikati ya miungu hakuna kama wewe,

hakuna matendo ya kulinganishwa na yako.

⁹Ee Bwana, mataifa yote uliyoyafanya

yatakuja na kuabudu mbele zako;

wataliletea utukufu jina lako.

¹⁰Kwa maana wewe ni mkuu, na unafanya mambo ya ajabu;

wewe peke yako ndiwe Mungu.

¹¹Ee Bwana , nifundishe njia yako,

nami nitaenda katika kweli yako;

nipe moyo usiositasita,

ili niweze kulicha jina lako.

¹²Ee Bwana Mungu wangu, nitakusifu kwa moyo wote;

nitaliadhimisha jina lako milele.

¹³Kwa maana upendo wako ni mkuu kwangu;

umeniokoa kutoka vilindi vya kaburi.

¹⁴Ee Mungu, wenye majivuno wananishambulia;

kundi la watu wakatili linatafuta uhai wangu:

watu wasiokuheshimu wewe.

¹⁵Lakini wewe, Ee Bwana, ni Mungu wa huruma na neema,

si mwepesi wa hasira,

bali ni mwingi wa upendo na uaminifu.

¹⁶Nigeukie na unihurumie;

mpe mtumishi wako nguvu zako,

mwokoe mwana wa mjakazi wako.

¹⁷Nipe ishara ya wema wako,

ili adui zangu waione nao waaibishwe,

kwa kuwa wewe, Ee Bwana ,

umenisaidia na kunifariji.