¹Lakini, ndugu, kuhusu nyakati na majira, hamna haja niwaandikie.[#Mt 24:36]

²Maana ninyi wenyewe mnajua hakika ya kuwa siku ya Bwana yaja kama vile mwizi ajavyo usiku.[#Mt 24:42-44; Ufu 3:3; 16:15; Lk 12:39; 2 Pet 3:10]

³Wakati wasemapo, Kuna amani na salama, ndipo uharibifu uwajiapo kwa ghafla, kama vile uchungu umjiavyo mwenye mimba, wala hakika hawataokolewa.[#Yer 6:14; Yn 16:21,22; Mt 24:39; Lk 21:34,35]

⁴Bali ninyi, ndugu, hamko gizani, hata siku ile iwapate kama mwizi.

⁵Kwa kuwa ninyi nyote mmekuwa wana wa nuru, na wana wa mchana; sisi si wa usiku, wala wa giza.[#Rum 13:12; Efe 5:9]

⁶Basi tusilale usingizi kama wengine, bali tukeshe, na kuwa na kiasi.

⁷Maana walalao usingizi hulala usiku, pia na walewao hulewa usiku.

⁸Lakini sisi tulio wa mchana, tuwe na kiasi, hali tukijivika kifuani imani na upendo, na chapeo yetu iwe tumaini la wokovu.[#Isa 59:17; Efe 6:13-17]

⁹Kwa kuwa Mungu hakutuweka ili tupate hasira yake, bali ili tupate wokovu, kwa Bwana wetu Yesu Kristo;[#1 The 1:10; 2 The 2:14]

¹⁰ambaye alikufa kwa ajili yetu, ili tuishi pamoja naye, iwe tunakesha au tunalala.[#1 The 4:14; Rum 14:8,9]

¹¹Basi, farijianeni na kujengana kila mtu na mwenzake, hakika kama mnavyofanya.[#Yud 1:20]

Mausia ya mwisho, salamu na baraka

¹²Lakini, ndugu, tunataka mwatambue wale wanaojitaabisha kwa ajili yenu, na kuwasimamia ninyi katika Bwana, na kuwaonyeni;[#1 Kor 16:18; 1 Tim 5:17]

¹³mkawastahi sana katika upendo, kwa ajili ya kazi zao. Iweni na amani ninyi kwa ninyi.

¹⁴Ndugu, tunawasihi, waonyeni wale wasiokaa kwa utaratibu; watieni moyo walio dhaifu; watieni nguvu wanyonge; vumilieni na watu wote.[#2 The 3:6,11,15]

¹⁵Angalieni mtu awaye yote asimlipe mwenziwe mabaya kwa mabaya; bali siku zote lifuateni lililo jema, ninyi kwa ninyi na kwa watu wote.[#Mit 20:22; Rum 12:17; 1 Pet 3:9]

¹⁶Furahini siku zote;[#Flp 4:4]

¹⁷ombeni bila kukoma;[#Lk 18:1; Rum 12:12; Kol 4:2]

¹⁸shukuruni kwa kila jambo; maana hayo ni mapenzi ya Mungu kwenu katika Kristo Yesu.[#Efe 5:20]

¹⁹Msimzimishe Roho;[#1 Kor 14:1,29,30,39]

²⁰msitweze unabii;

²¹jaribuni mambo yote; lishikeni lililo jema;[#1 Yoh 4:1]

²²jitengeni na ubaya wa kila namna.[#Ayu 1:1,8; 2:3]

²³Mungu wa amani mwenyewe awatakase kabisa; nanyi nafsi zenu na roho zenu na miili yenu mhifadhiwe muwe kamili, bila lawama, wakati wa kuja kwake Bwana wetu Yesu Kristo.[#2 The 3:16]

²⁴Yeye ni mwaminifu ambaye awaita, naye atafanya.[#1 Kor 1:9; 2 The 3:3]

²⁵Ndugu, tuombeeni.[#2 The 3:1]

²⁶Wasalimieni ndugu wote kwa busu takatifu.[#1 Kor 16:20]

²⁷Nawaapisha kwa Bwana, ndugu wote wasomewe waraka huu.

²⁸Neema ya Bwana wetu Yesu Kristo na iwe pamoja nanyi.