Yethro Amshauri Musa

¹Basi Yethro, kuhani wa Midiani, mkwewe Musa, alisikia habari ya mambo hayo yote Mungu aliyokuwa amemtendea Musa, na Waisraeli watu wake, jinsi BWANA alivyowaleta Israeli watoke Misri.

²Ndipo Yethro mkwewe Musa akamtwaa Sipora, mke wa Musa, baada ya yeye kumrudisha,[#Kut 2:21-22]

³pamoja na wanawe wawili; katika hao, jina la mmoja ni Gershomu, maana alisema, Mimi nimekuwa mgeni katika nchi za kigeni;[#Mdo 7:29; #18:3 Katika Kiebrania ni mgeni au mkimbizi.]

⁴na jina la wa pili ni Eliezeri, kwa kuwa alisema, Yeye Mungu wa baba yangu alikuwa msaada wangu, akaniokoa na upanga wa Farao.[#18:4 Katika Kiebrania ‘Eli’ ina maana ya ‘Mungu wangu’ na ‘Ezeri’ lina maana ya ‘msaada’.]

⁵Basi Yethro, mkwewe Musa, pamoja na mke wa Musa na wanawe wawili wakamwendea Musa huko nyikani, hapo alipokuwa amepiga kambi, kwenye mlima wa Mungu;

⁶naye akamwambia Musa, Mimi Yethro mkweo nimekuja kwako, na mkeo, na wanawe wawili pamoja naye.

⁷Basi Musa akatoka nje ili amlaki mkwewe, akamwinamia na kumbusu; nao wakaulizana habari; kisha wakaingia hemani.

⁸Musa akamwambia mkwewe mambo hayo yote BWANA aliyomtenda Farao na Wamisri kwa ajili ya Israeli, na mambo mazito yote yaliyowapata njiani, na jinsi BWANA alivyowaokoa.

⁹Yethro alifurahi kwa ajili ya wema wote BWANA aliowatendea Israeli, kwa alivyowaokoa mikononi mwa Wamisri.

¹⁰Kisha Yethro akasema, Na ahimidiwe BWANA aliyewaokoa na mikono ya Wamisri, na mkono wa Farao; aliyewaokoa watu hao watoke mikononi mwa Wamisri.

¹¹Sasa najua ya kuwa BWANA ni mkuu kuliko miungu yote; naam, katika jambo hilo walilowatenda kwa ujeuri.[#2 Nya 2:5; Zab 95:3; 97:9; Isa 37:16-20; Dan 2:47; Ayu 40:11; Lk 1:51]

¹²Yethro mkwewe Musa akamletea Mungu sadaka ya kuteketezwa na dhabihu; na Haruni akaja, na wazee wote wa Israeli, wale chakula pamoja na mkwewe Musa mbele za Mungu.[#Kum 12:7; 1 Kor 10:18,21,31]

¹³Asubuhi yake Musa akaketi ili awaapishie hukumu watu; na hao watu wakasimama kumzunguka Musa tangu asubuhi hata jioni.

¹⁴Mkwewe Musa alipoyaona yote aliyowafanyia watu, akasema, Ni jambo gani hili uwatendealo hao watu? Kwani wewe kuketi hapo peke yako, na watu wote kusimama kwako tangu asubuhi hata jioni?

¹⁵Musa akamwambia mkwewe, Ni kwa sababu watu hunijilia mimi wapate kumwuliza Mungu;

¹⁶wakiwa na neno, hunijia; nami naamua kati ya mtu na mwenziwe, nami nawajulisha amri za Mungu, na sheria zake.[#2 Sam 15:3; Ayu 31:13; Hes 36:6]

¹⁷Mkwewe Musa akamwambia, Jambo hili ufanyalo si jema.

¹⁸Kwa kweli utajidhoofisha mwenyewe, na hawa watu walio pamoja nawe pia; maana jambo hili ni zito mno kwako; huwezi wewe kulitenda peke yako.[#Hes 11:14; Kum 1:9,12]

¹⁹Sikiliza sasa neno langu, nitakupa shauri, na Mungu na awe pamoja nawe; wewe uwe kwa ajili ya watu mbele ya Mungu, nawe umletee Mungu maneno yao;[#Kum 5:5; Hes 27:5]

²⁰nawe utawafundisha zile amri na sheria, nawe utawaonesha njia ambayo inawapasa kuiendea, na kazi ambayo inawapasa kuifanya.[#Kum 4:1,5; Zab 143:8; Kum 1:18]

²¹Zaidi ya hayo utajipatia katika watu hawa watu walio na uwezo, wenye kumcha Mungu, watu wa kweli, wenye kuchukia mapato ya udhalimu; ukawaweka juu yao, wawe wakuu wa maelfu, na wakuu wa mamia, na wakuu wa hamsini hamsini, na wakuu wa kumi kumi;[#Kum 16:18; Mdo 6:3; Mwa 42:18; 2 Sam 23:3; Eze 18:8]

²²nao wawaamue watu hawa siku zote; kisha, kila neno lililo kubwa watakuletea wewe, lakini kila neno dogo wataliamua wenyewe; basi kwako wewe mwenyewe utapata nafasi zaidi, nao watauchukua huo mzigo pamoja nawe.[#Law 24:11; Hes 15:33; Kum 17:8]

²³Kwamba utafanya jambo hili, na Mungu akikuagiza hivyo, basi utaweza kusimama wewe, na watu hawa wote nao watakwenda mahali pao kwa amani.

²⁴Basi Musa akalisikiliza neno la mkwewe, akayafanya yote aliyokuwa amemwambia.

²⁵Musa akawachagua watu wenye uwezo katika Israeli yote, akawaweka wawe vichwa juu ya watu, wakuu wa maelfu, na wakuu wa mamia, na wakuu wa hamsini hamsini, na wakuu wa kumi kumi.[#Kum 1:15; Mdo 6:5]

²⁶Nao wakawaamua watu siku zote; mashauri magumu wakamletea Musa, lakini kila neno dogo wakaliamua wenyewe.[#Ayu 29:16]

²⁷Kisha Musa akaagana na mkwewe; naye akaenda zake, mpaka nchi yake mwenyewe.[#Hes 10:29]