Mpango wa kumwua Yesu

¹Ikawa Yesu alipomaliza maneno hayo yote, aliwaambia wanafunzi wake,[#Mt 7:28; 11:1; 13:53; 19:1]

²Mnajua ya kuwa baada ya siku mbili itakuwa Pasaka, na Mwana wa Adamu atasalitiwa asulubiwe.[#Mk 14:1,2; Lk 22:1,2; #Kut 12:1-27; Mt 20:18]

³Wakati ule wakuu wa makuhani, na wazee wa watu, wakakusanyika katika behewa ya Kuhani Mkuu, jina lake Kayafa;

⁴wakafanya shauri pamoja, ili wamkamate Yesu kwa hila na kumwua.

⁵Lakini wakasema, Isiwe wakati wa sikukuu, isije ikatokea ghasia miongoni mwa watu.

Yesu apakwa mafuta Bethania

⁶Naye Yesu alipokuwapo Bethania katika nyumba ya Simoni mwenye ukoma,[#Mk 14:3-9; Lk 7:36-50; Yn 12:1-8]

⁷mwanamke mwenye kibweta cha marhamu ya thamani kubwa alimkaribia akaimimina kichwani pake alipoketi chakulani.[#Lk 7:37-38]

⁸Wanafunzi wake walipoona, wakakasirika, wakasema, Ni wa nini upotevu huu?

⁹Maana marhamu hii ingaliweza kuuzwa kwa fedha nyingi wakapewa maskini.

¹⁰Yesu akatambua akawaambia, Mbona mnamtaabisha mwanamke? Maana ni kazi njema aliyonitendea mimi.[#Lk 11:7]

¹¹Kwa maana siku zote mnao maskini pamoja nanyi; lakini mimi hamko nami siku zote.[#Kum 15:11]

¹²Maana kwa kunimwagia mwili wangu marhamu hiyo, ametenda hivyo ili kuniweka tayari kwa maziko yangu.

¹³Amin, nawaambieni, Kila patakapohubiriwa Injili hii katika ulimwengu wote, tendo hilo alilolitenda huyu litatajwa pia kwa kumbukumbu yake.

Yuda akubali kumsaliti Yesu

¹⁴Wakati huo mmoja wa wale Kumi na Wawili, jina lake Yuda Iskarioti, aliwaendea wakuu wa makuhani,[#Mk 14:10,11; Lk 22:3-6]

¹⁵akasema, Ni nini mtakachonipa, nami nitamsaliti kwenu? Wakampimia vipande thelathini vya fedha.[#Zek 11:12; Yn 11:57; #26:15 Yapata kama shilingi 90.]

¹⁶Tokea wakati huo akawa akitafuta nafasi apate kumsaliti.[#1 Tim 6:9,10]

Yesu katika Pasaka pamoja na wanafunzi

¹⁷Katika siku ya kwanza ya mikate isiyotiwa chachu, wanafunzi wake wakamwendea Yesu, wakamwambia, Ni wapi utakapo tukuandalie uile Pasaka?[#Mk 14:12-16; Lk 22:7-13; #Kut 12:18-20]

¹⁸Akasema, Nendeni mjini kwa mtu fulani, mkamwambie, Mwalimu asema, Majira yangu ni karibu; kwako nitafanya Pasaka pamoja na wanafunzi wangu.[#Mt 21:3]

¹⁹Wanafunzi wakafanya kama Yesu alivyowaagiza, wakaiandaa Pasaka.

²⁰Basi kulipokuwa jioni aliketi chakulani pamoja na wale Kumi na Wawili.[#Mk 14:17-26; Lk 22:14-23; Yn 13:21-26]

²¹Nao walipokuwa wakila, alisema, Amin, nawaambia, Mmoja wenu atanisaliti.

²²Wakahuzunika sana, wakaanza kumwuliza mmoja mmoja, Ni mimi, Bwana?

²³Akajibu akasema, Yeye aliyetia mkono wake pamoja nami katika bakuli, ndiye atakayenisaliti.[#Zab 41:10]

²⁴Mwana wa Adamu aenda zake, kama alivyoandikiwa; lakini ole wake mtu yule ambaye amsaliti Mwana wa Adamu! Ingekuwa heri kwake mtu yule kama asingalizaliwa.

²⁵Yuda, yule mwenye kumsaliti, akajibu, akasema, Ni mimi, Rabi? Akamwambia, Wewe umesema.

Kuanzishwa kwa chakula cha Bwana

²⁶Nao walipokuwa wakila Yesu alitwaa mkate, akabariki, akaumega, akawapa wanafunzi wake, akasema, Twaeni, mle; huu ndio mwili wangu[#Mt 14:19; 1 Kor 11:23-25]

²⁷Akakitwaa kikombe, akashukuru, akawapa, akisema, Kuyweni nyote katika hiki;

²⁸kwa maana hii ndiyo damu yangu ya agano, imwagikayo kwa ajili ya wengi kwa ondoleo la dhambi.[#Kut 24:8; Yer 31:31-34; Zek 9:11]

²⁹Lakini nawaambieni, Sitakunywa kabisa tangu sasa uzao huu wa mzabibu, hata siku ile nitakapokunywa mpya pamoja nanyi katika ufalme wa Baba yangu.

³⁰Nao walipokwisha kuimba, wakatoka nje kwenda katika mlima wa Mizeituni.[#Zab 113–118; Lk 22:39; Yn 18:1]

Yesu asema kuwa Petro atamkana

³¹Ndipo Yesu akawaambia, Ninyi nyote mtachukizwa kwa ajili yangu usiku huu kwa kuwa imeandikwa, Nitampiga mchungaji, na kondoo wa kundi watatawanyika.[#Mk 14:27-31; Lk 22:31-34; #Zek 13:7; Yn 16:32]

³²Lakini baada ya kufufuka kwangu, nitawatangulia kwenda Galilaya.[#Mt 28:7,16]

³³Petro akajibu, akamwambia, Wajapochukizwa wote kwa ajili yako, mimi sitachukizwa kamwe.

³⁴Yesu akamwambia, Amin, nakuambia wewe, usiku huu kabla ya kuwika jogoo, utanikana mara tatu.[#Yn 13:38]

³⁵Petro akamwambia, Ijaponipasa kufa nawe, sitakukana kamwe. Na wanafunzi wote wakasema vivyo hivyo.[#Mt 26:56]

Yesu aomba katika Gethsemane

³⁶Kisha Yesu akaenda pamoja nao mpaka bustani iitwayo Gethsemane, akawaambia wanafunzi wake, Ketini hapa, hata niende kule nikaombe.[#Mk 14:32-42; Lk 22:40-46]

³⁷Akamchukua Petro na wale wana wawili wa Zebedayo, akaanza kuhuzunika na kusononeka.[#Ebr 5:7]

³⁸Ndipo akawaambia, Roho yangu ina huzuni nyingi kiasi cha kufa; kaeni hapa, mkeshe pamoja nami.[#Zab 43:5; Yn 12:27]

³⁹Akaendelea mbele kidogo, akaanguka kifudifudi, akaomba, akisema, Baba yangu, ikiwezekana, kikombe hiki kiniondokee; lakini si kama nitakavyo mimi, bali kama utakavyo wewe.[#Yn 18:11; Ebr 5:8]

⁴⁰Akawajia wale wanafunzi, akawakuta wamelala, akamwambia Petro, Je! Hamkuweza kukesha pamoja nami hata saa moja?

⁴¹Kesheni, mwombe, msije mkaingia majaribuni; roho iko radhi, lakini mwili ni dhaifu.[#Ebr 2:14; 4:15]

⁴²Akaenda tena mara ya pili, akaomba, akisema, Baba yangu, ikiwa haiwezekani kikombe hiki kiniondokee nisipokunywa, mapenzi yako yatimizwe.

⁴³Akaja tena, akawakuta wamelala; maana macho yao yalijawa na usingizi.

⁴⁴Akawaacha tena, akaenda, akaomba mara ya tatu, akisema maneno yale yale.[#2 Kor 12:8]

⁴⁵Kisha akawajia wanafunzi wake, akawaambia, Laleni sasa, mpumzike tazama, saa imekaribia, na Mwana wa Adamu anatiwa katika mikono ya wenye dhambi.

⁴⁶Ondokeni, twende zetu! Tazama, yule anayenisaliti amekaribia.[#Yn 14:31]

Kusalitiwa na kukamatwa kwa Yesu

⁴⁷Basi alipokuwa katika kusema, tazama, Yuda, mmoja wa wale Kumi na Wawili akaja, na pamoja naye kundi kubwa wenye panga na marungu, wametoka kwa wakuu wa makuhani na wazee wa watu.[#Mk 14:43-50; Lk 22:47-53; Yn 18:3-12]

⁴⁸Na yule mwenye kumsaliti alikuwa amewapa ishara, akisema, Nitakayembusu, huyo ndiye; mkamateni.

⁴⁹Mara akamwendea Yesu, akasema, Salamu, Rabi, akambusu.

⁵⁰Yesu akamwambia, Rafiki, fanya ulilolijia. Wakaenda, wakanyosha mikono yao wakamkamata Yesu.

⁵¹Na tazama, mmoja wa wale waliokuwa pamoja na Yesu akanyosha mkono wake, akaufuta upanga wake, akampiga mtumwa wa Kuhani Mkuu, akamkata sikio.

⁵²Ndipo Yesu akamwambia, Rudisha upanga wako mahali pake, maana wote waushikao upanga, wataangamia kwa upanga.[#Mwa 9:6; Ufu 13:10]

⁵³Ama wadhani ya kuwa mimi siwezi kumsihi Baba yangu, naye ataniletea sasa hivi zaidi ya majeshi kumi na mawili ya malaika?[#Yoe 3:11]

⁵⁴Yatatimizwaje basi maandiko, ya kwamba hivyo ndivyo vilivyopasa kujiri?

⁵⁵Saa ile Yesu akawaambia makutano, Je, mmetoka kama kumkamata mnyang'anyi, wenye panga na marungu, ili kunishika? Kila siku niliketi hekaluni nikifundisha, msinikamate.[#Lk 19:47; 21:37]

⁵⁶Lakini haya yote yamekuwa, ili maandiko ya manabii yatimizwe. Ndipo wanafunzi wote wakamwacha, wakakimbia.[#Mt 26:31]

Yesu mbele ya Kuhani Mkuu

⁵⁷Nao waliomkamata Yesu wakampeleka kwa Kayafa, Kuhani Mkuu, walikokuwa wamekutanika waandishi na wazee.[#Mk 14:53-72; Lk 22:54-71; Yn 18:12-27]

⁵⁸Na Petro akamfuata kwa mbali mpaka behewa ya Kuhani Mkuu, akaingia ndani, akaketi pamoja na watumishi, auone mwisho.

⁵⁹Basi wakuu wa makuhani na baraza yote wakatafuta ushuhuda wa uongo juu ya Yesu, wapate kumwua;

⁶⁰wasiuone ingawa walitokea mashahidi wa uongo wengi.

⁶¹Na baadaye wawili wakatokea, wakasema, Huyu alisema, Naweza kulivunja hekalu la Mungu, na kulijenga kwa siku tatu.[#Yn 2:19-21]

⁶²Kisha Kuhani Mkuu akasimama akamwambia, Hujibu neno? Hawa wanakushuhudia nini?

⁶³Lakini, Yesu akanyamaza. Kuhani Mkuu akamwambia, Nakuapisha kwa Mungu aliye hai, utuambie kama wewe ndiwe Kristo, Mwana wa Mungu.[#Mt 27:12]

⁶⁴Yesu akamwambia, Wewe umesema; lakini nawaambieni, Tangu sasa mtamwona Mwana wa Adamu ameketi katika mkono wa kuume wa nguvu, akija juu ya mawingu ya mbinguni.[#Dan 7:13; Zab 110:1; Mt 16:27; 24:30]

⁶⁵Ndipo Kuhani Mkuu akararua mavazi yake, akisema, Amekufuru; mna haja gani tena ya mashahidi? Tazameni, sasa mmesikia hiyo kufuru yake;[#Law 24:16; Mt 9:3; Yn 10:33]

⁶⁶mwaonaje ninyi? Wakajibu, wakasema, Imempasa kuuawa.[#Yn 19:7]

⁶⁷Ndipo wakamtemea mate usoni, wakampiga ngumi; na wengine wakampiga makofi,[#Isa 50:6]

⁶⁸wakisema, Ewe Kristo, tufumbulie; ni nani aliyekupiga?

Petro amkana Yesu

⁶⁹Na Petro alikuwa ameketi nje uani; kijakazi mmoja akamwendea, akasema, Wewe nawe ulikuwapo pamoja na Yesu wa Galilaya.

⁷⁰Akakana mbele ya wote, akisema, Sijui usemalo.

⁷¹Naye alipotoka nje hadi ukumbini, mwanamke mwingine alimwona, akawaambia watu waliokuwako huko, Huyu alikuwapo pamoja na Yesu Mnazareti.

⁷²Akakana tena kwa kiapo, Simjui mtu huyu.

⁷³Punde kidogo, wale waliokuwapo wakamwendea, wakamwambia Petro, Hakika wewe nawe u mmoja wao; kwa sababu hata usemi wako wakutambulisha.

⁷⁴Ndipo akaanza kulaani na kuapa akisema, Simjui mtu huyu. Na mara jogoo akawika.

⁷⁵Petro akalikumbuka lile neno la Yesu alilolisema, Kabla ya jogoo kuwika, utanikana mara tatu. Akatoka nje, akalia kwa majonzi.[#Mt 26:34]