Ombi la Huruma kwa Yerusalemu

¹Ee Mungu, mataifa wameingia katika urithi wako,[#2 Fal 25:8-10; 2 Nya 36:17-19; Yer 26:18; 52:12-14]

Wamelinajisi hekalu lako takatifu.

Wamefanya Yerusalemu chungu chungu.

²Wameziacha maiti za watumishi wako[#Yer 7:33]

Ziwe chakula cha ndege wa angani.

Na miili ya watauwa wako

Iwe chakula cha wanyama wa nchi.

³Wamemwaga damu yao kama maji[#Ufu 11:9]

Pande zote za Yerusalemu,

Wala hapakuwa na mtu wa kuwazika.

⁴Tumekuwa lawama kwa jirani zetu,

Mzaha na dhihaka kwao wanaotuzunguka.

⁵Ee BWANA, hadi lini? Utaona hasira milele?[#Kum 29:20; Eze 36:5]

Wivu wako utawaka kama moto?

⁶Ukali wako uwamwagie mataifa wasiokujua,[#Isa 45:4; Zab 53:4]

Na falme za hao wasioliitia jina lako.

⁷Kwa maana wamemla Yakobo,

Na makao yake wameyaharibu.

⁸Usikumbuke juu yetu maovu ya baba zetu,[#Isa 43:25]

Rehema zako zije kutulaki haraka,

Kwa maana tumeteseka sana.

⁹Ee Mungu wa wokovu wetu, utusaidie,[#Yos 10:6; Yer 14:7]

Kwa ajili ya utukufu wa jina lako.

Utuokoe, utusamehe dhambi zetu,

Kwa ajili ya jina lako.

¹⁰Kwa nini mataifa yaseme,

Yuko wapi Mungu wao?

Kisasi cha damu ya watumishi wako iliyomwagika

Kijulikane kati ya mataifa machoni petu.

¹¹Kuugua kwake aliyefungwa[#Hes 14:17]

Na kuingie mbele zako.

Kwa kadiri ya uweza wa mkono wako

Uwahifadhi waliohukumiwa kufa.

¹²Uwalipe jirani zetu mara saba vifuani mwao

Laumu zao walizokulaumu, Ee Bwana.

¹³Na sisi tulio watu wako,[#Isa 43:21]

Na kondoo za malisho yako,

Tutakushukuru milele;

Tutazisimulia sifa zako kizazi hadi kizazi.