Sala ya msaada katika wakati wa kukata tamaa

¹Ee BWANA, Mungu wa wokovu wangu

Mchana na usiku nimelia mbele zako.

²Maombi yangu yafike mbele zako,

Ukitegee kilio changu sikio lako.

³Maana nafsi yangu imeshiba taabu,

Na uhai wangu umekaribia kuzimu.

⁴Nimehesabiwa pamoja nao washukao shimoni;

Nimekuwa kama mtu asiye na msaada.

⁵Miongoni mwao waliokufa nimetupwa,

Kama waliouawa walalao makaburini.

Hao ambao Wewe huwakumbuki tena,

Wametengwa mbali na mkono wako.

⁶Mimi umenilaza chini katika shimo,

Katika mahali penye giza vilindini.

⁷Ghadhabu yako imenilemea,

Umenitesa kwa mawimbi yako yote.

⁸Wanijuao umewatenga nami;

Umenifanya kuwa chukizo kwao;

Nimefungwa wala siwezi kutoka.

⁹Jicho langu limefifia kwa ajili ya mateso

BWANA, ninakuita kila siku;

Ninakunyoshea Wewe mikono yangu.

¹⁰Je! Wafu utawafanyia miujiza?

Au waliofariki watasimama na kukuhimidi?

¹¹Fadhili zako zitasimuliwa kaburini?

Au uaminifu wako katika uharibifu?

¹²Miujiza yako itajulikana gizani?[#Ayu 10:21; Zab 31:12; Mhu 8:10]

Au haki yako katika nchi ya usahaulifu?

¹³Lakini mimi nimekulilia Wewe, BWANA,

Na asubuhi maombi yangu yatakuwasilia.

¹⁴BWANA, kwa nini kuitupa nafsi yangu,

Na kunificha uso wako?

¹⁵Nimeteswa tangu ujana wangu na niko karibu kufa,[#Ayu 6:4; Isa 53:8; Dan 9:26]

Nimeumia kwa mapigo yako; nami nimekata tamaa.

¹⁶Hasira zako kali zimenizidia,

Mapigo yako yatishayo yameniangamiza.

¹⁷Yamenizunguka kama mafuriko mchana kutwa,

Yamenisonga kwa kila upande.

¹⁸Mpenzi na rafiki umewatenga nami,[#Ayu 19:13]

Nao wanijuao wamo gizani.