Fadhili

¹Utoapo fadhili, uwe na hakika ya mtu umfadhiliye; na fadhili zako zitakuta shukrani.[#Mt 7:6]

²Umfadhili mwenye akili, nawe utaona thawabu; kama si kwake yeye, utaipata kwake Aliye Juu.

³Hakuna mema yatakayomjia yule anayeendelea katika maovu, wala mtu yule asiyetoa sadaka.

⁴Basi mpe mwenye adili, usimsaidie mwenye dhambi;

⁵mfadhili mnyonge, usimpe asiye haki chochote; hata chakula umnyime usimpe, asije akakuangamiza hivyo; kwa kuwa utapokea mabaya maradufu badala ya mema yote uliyomtendea.

⁶Naam, Aliye Juu huchukizwa na wenye dhambi, naye atajilipiza kisasi juu yao wasio haki.

⁷Basi, mpe mtu mwema, usimsaidie mwenye dhambi.

Marafiki wa Kweli na wa Uongo

⁸Rafiki wa mtu hajaribiwi wakati wa heri, wala adui yake hafichiki wakati wa shari.

⁹Mtu akiona heri hata adui zake watakuwa ni rafiki; akipatwa na shari hata rafiki yake aweza kufarakana naye.

¹⁰Usimtegemee adui yako, maana kama kutu ya shaba ndivyo ulivyo ubaya wake;

¹¹ingawa amejidhili na kuigandama nchi, uangalie na kujihadhari naye; (utakuwa kwake mfano wa mtu anayeupangusa upatu, na kujua ya kwamba kutu ikalipo).

¹²Huyo usimweke karibu nawe, asije akakuondoa akasimama mahali pako; usimketishe mkono wa kuume asije akatafuta kukichukua kiti chako. Hatimaye utayakiri maneno yangu, na kuchomwa kwa mithali zangu.

¹³Ni nani atakayemhurumia mganga aliyeumwa na nyoka wake? Au mtu yeyote ambaye huwakaribia wanyama wakali?

¹⁴Vivyo hivyo ni nani atakayemhurumia mtu amwendeaye mkosaji, na kushirikiana naye katika dhambi zake?

¹⁵Muda kitambo atakaa nawe lakini mara ukipungua nguvu yeye hatadumu;

¹⁶mradi adui atabembeleza kwa midomo yake, bali moyoni mwake anafanya shauri jinsi ya kukuangusha shimoni; aidha, adui atatoka machozi machoni pake, bali akiona nafasi haitamtosha damu yako.

¹⁷Ukipatwa na shari, utamwona papo hapo amekutangulia; na kana kwamba anataka kukusaidia atakupiga akumalize.

¹⁸Naye atatikisa kichwa, na kupiga makofi, na kunong'ona tele, na kubadili uso wake.