Wajibu kwa Wazazi

¹Wanangu, mnisikilize mimi, baba yenu, na kutenda kama haya, ili mfanikiwe.

²Madhali BWANA amempa baba utukufu kuhusu wana, na kuithibitisha haki ya mama kuhusiana na watoto.

³Amheshimuye baba yake atafanya upatanisho wa dhambi,

⁴naye amtukuzaye mama yake huweka akiba iliyo azizi.

⁵Amheshimuye babaye atawafurahia watoto wake mwenyewe, na siku ya kuomba dua atasikiwa.

⁶Amtukuzaye baba yake ataongezewa siku zake; akimsikiliza BWANA, atamstarehesha mamaye,

⁷na kuwatumikia wazazi wake kama mabwana.

⁸Katika neno na katika tendo umheshimu baba yako, ili baraka zote zikujie kutoka kwake.[#Kut 20:12]

⁹Mradi baraka ya baba itaziimarisha nyumba zao watoto, bali laana ya mama huing'oa misingi.

¹⁰Usijisifu hata kumwaibisha baba yako, maana aibu ya baba yako siyo utukufu wako.

¹¹Utukufu wa mtu ndio utokao katika heshima ya baba yake, na mama aliyefedheheka ni lawama ya watoto wake.

¹²Mwanangu, umsaidie baba yako katika uzee wake; wala usipate kumhuzunisha siku zote za maisha yake.

¹³Akiwa amepungukiwa na ufahamu umwie kwa upole, wala usimdharau iwapo wewe u mzima sana;

¹⁴kwa maana sadaka apewayo baba haitasahauliwa, na badala ya dhambi itahesabiwa kwa kukuthibitisha;

¹⁵siku ya msiba wako itakumbukwa juu yako; kama jua kali juu ya sakitu, ndivyo dhambi zako zitakavyoyeyuka.

¹⁶Mwenye kumdharau baba yake ni mfidhuli, naye mwenye kumlaani mama yake amekwisha kulaaniwa na BWANA.

Unyenyekevu

¹⁷Mwanangu, wakati wa kufanikiwa uendelee katika unyenyekevu; hivyo utapendwa kuliko mweye ukarimu.

¹⁸Kadiri ulivyo mkuu uzidi kujinyenyekeza,[#Flp 2:3]

¹⁹nawe utapata kibali machoni pa BWANA;

²⁰kwa maana rehema zake BWANA ni kuu, na siri yake ni kwa wanyenyekevu.

²¹Usiyatafute mambo ya ajabu ya kukushinda, wala kuyachunguza yaliyositirika kwako.

²²Yale uliyoagizwa uyatafakari, huna haja ya mambo yaliyofichwa.[#Kum 29:29]

²³Usijishughulishe na mambo yasiyodirikika, maana umekwisha kuoneshwa mengi zaidi kuliko watu wawezavyo kufahamu.

²⁴Lakini majivuno ya wanadamu ni mengi,

na mawazo ya upuzi yawaongoza watu kunako ukosefu.

²⁵Bila mboni ya jicho hakuna nuru,

Wala hakuna hekima bila ufahamu.

Kiburi

²⁶Moyo mgumu utapata kisirani halafu,

Bali apendaye mema atakwenda nayo.

²⁷Moyo mgumu utazidishiwa mashaka,

Na mkosaji hujirundikia dhambi juu ya dhambi.

²⁸Msiba wa mwenye kiburi hauleti kupona,

Mche wa uovu umepandwa ndani yake.

²⁹Moyo wa busara utatambua mithali,

Na sikio sikivu ni tamaa ya mtaalamu.

Sadaka kwa Maskini

³⁰Maji huuzimisha moto uwakao,

Na sadaka huwa upatanisho wa dhambi.

³¹Alipaye hisani itamkuta njiani,

Na wakati wa kuanguka atapata nguzo.