Sheria na Dhabihu

¹Mwenye kuishika torati ndiye azidishaye matoleo; mwenye kuziangalia amri ndiye aitoaye kafara ya amani;

²amlipaye mwenzake hisani yake hutoa sadaka ya unga bora; naye atoaye sadaka kwake maskini hutoa dhabihu ya kushukuru.

³Kuuacha uovu kwampendeza BWANA, na kujitenga na udhalimu ni kipatanisho.

⁴Lakini ujihadhari usitokee mbele za BWANA mikono mitupu; maana sharti hayo yote yatendeke kwa ajili ya amri.

⁵Toleo lake mwenye haki lina kibali madhabahuni, na harufu yake tamu, yafika mbele zake Aliye Juu.

⁶Dhabihu ya mwenye haki yakubalika, wala kumbukumbu lake halisahauliki.

⁷Umheshimu BWANA kwa jicho la ukarimu, wala usimtolee malimbuko ya kazi za mikono yako kwa ubahili.

⁸Kwa kila kitolewacho uonyeshe ukunjufu wa uso, hata sehemu ya kumi uiweke wakfu kwa changamko.

⁹Mpe Mungu kama alivyokupa wewe; na kama mkono wako ulivyopata, utoe kwa ukarimu.[#2 Kor 9:7]

¹⁰Amhurumiaye maskini humkopesha BWANA, naye ni nani awezaye kulipa isipokuwa ni Yeye; kwa kuwa BWANA hulipa, naye atakulipa wewe mara saba.

Haki ya Mungu

¹¹Usidhanie kuwa unaweza kutoa rushwa, kwa maana Yeye hazipokei; wala usiwaze moyoni kutoa dhabihu ya jeuri,

¹²kwa kuwa BWANA ndiye mhukumu wala hakijali cheo cha mtu.

¹³Hatamkubali yeyote juu ya maskini, naye ataisikiliza sala yake aliyedhulumiwa.

Haki ya Mungu

¹⁴Hatayadharau kamwe malalamiko ya yatima, wala ya mjane amwelezapo habari zake.

¹⁵Je! Machozi ya mjane hayachuruziki mashavuni mwake? Naye aziugulia taabu zake zilizoyatokeza.

¹⁶Malalamiko yake aliyeonewa yatapata kukubaliwa, na dua yake itafika hima mbinguni.

¹⁷Sala yake mnyenyekevu hupenya mawingu; wala haitatulia hata itakapowasili;

¹⁸wala haitaondoka hata Aliye Juu atakapoiangalia, akaamua kwa adili, akatekeleza hukumu.

¹⁹Wala BWANA hatalegea, wala hatakuwa mvumilivu kwa wanadamu,

²⁰hata atakapoviseta viuno vyao wasio na rehema; hata atakapowalipiza kisasi mataifa;

²¹hata atakapouondoa utawala wa wenye kiburi, na kuzivunja fimbo za enzi za wadhalimu;

²²hata atakapomlipa kila mtu sawasawa na matendo yake, na kazi za wanadamu kwa kadiri ya mawazo yao;

²³hata atakapohukumu kesi ya watu wake, na kuwafurahisha kwa wokovu wake.

²⁴Huruma huwafikia watu wakati wa mateso,

Kama mawingu ya mvua wakati wa kaskazi.