Mwisho wa mwenye haki

¹Bali roho zao wenye haki zimo mkononi mwa Mungu, wala maumivu hayatawagusa.

²Machoni pa watu walio wajinga walionekana kwamba wamekufa, na kufariki kwao kulidhaniwa kuwa ni hasara yao,[#Hek 4:17]

³na kusafiri kwao kutoka kwetu kuwa ni uharibifu wao; bali wao wenyewe wamo katika amani.

⁴Kwa sababu hata ikiwa (waonavyo watu) wanaadhibiwa, hata hivyo taraja lao limejaa kutokufa,

⁵na wakiisha kustahimili kurudiwa kidogo watapokea wingi wa mema. Kwa kuwa Mungu amewajaribu, na kuwaona kuwa wamemstahili,[#Rum 8:18; 2 Kor 4:17]

⁶kama dhahabu katika tanuri aliwajaribu, akawakubali mithili ya kafara.

⁷Wakati wa kujiliwa kwao watang'aa, na kama vimulimuli katika mabua makavu watametameta.

⁸Watawahukumu mataifa na kuwatawala makabila ya watu; naye BWANA atawamiliki milele na milele.

⁹Wenye kumtumaini watafahamu yaliyo kweli, na waaminifu watakaa naye katika upendo; mradi neema na rehema zina wateule wake.

Mwisho wa wasiomcha Mungu

¹⁰Lakini wasio haki watalipwa kama vile walivyohojiana, ambao walimdharau mwenye haki na kumkosea BWANA;

¹¹kwa maana mwenye kubeza hekima na malezi amekuwa duni. Na tumaini lao ni ubatili, wala kazi zao hazina faida, wala matendo yao hayafai kitu.

¹²Wake zao ni wapumbavu, na watoto wao ni wakorofi, hata kulaaniwa katika kuzaliwa kwao.

Heri mke tasa kuliko kizazi cha uovu

¹³Madhali yu heri yeye asiyezaa maadamu yu safi, hakuchukua mimba kwa kukosa; yeye atakuwa na matunda wakati ule Mungu atakapoangalia roho za watu.

Kuhusu wasiozaa

¹⁴Naye yu heri towashi ambaye hakutenda yasiyo sheria kwa mikono yake, wala hakuwaza maovu juu ya BWANA, mradi atapewa upendeleo kwa ajili ya uaminifu wake, na kura yake katika patakatifu pa BWANA itapendeza kuliko mke na watoto.

¹⁵Yaani, matendo mema yanayo matunda ya sifa njema, wala shina la ufahamu halikosekani.

¹⁶Bali watoto wa wazinzi hawawezi kupevuka, na wazao wa umalaya watatoweka.

¹⁷Hata wakiishi sana watahesabiwa kuwa ni hafifu, wala mwisho wa uzee wao hautakua na heshima;

¹⁸tena wakifariki upesi hawana tumaini, wala hawatapata faraja siku ya neno mkataa.

¹⁹Kwa maana mwisho wa kizazi kisicho haki siku zote ni mlemavu; basi, afadhali hali iliyo gumba pamoja na utakatifu.