Sulemani ni sawa na watu wengine

¹Mimi mwenyewe ni mwanadamu, sawa na watu wote, mzao wake aliyezaliwa kutoka mavumbini, mtu wa kwanza aliyeumbwa.

²Na ndani ya tumbo la mama yangu nikafanyizwa mwili katika muda wa miezi kumi, nikatungishwa katika damu kwa mbegu ya kibinadamu mnamo upendezi wa kitandani.

³Mimi nami nilipozaliwa, nilivuta pumzi sawa na wengine, nikaanguka juu ya nchi yenye asili moja nami, na sauti ya kwanza niliyoitoa ilikuwa kilio, kama watu wote.

⁴Nikalelewa, nikavikwa mavazi ya kitoto, nikatunzwa kwa uangalifu.

⁵Maana hakuna mfalme aliyekuwa na mwanzo mwingine;

⁶watu wote huingia maishani kwa njia moja, na wote hutoka kwa njia moja.

Sulemani aheshimu Hekima

⁷Kwa sababu hiyo niliomba, nikapewa ufahamu; nilimwita Mungu, nikajiliwa na roho ya Hekima.[#1 Fal 3:6-9; Hek 9:1-8]

⁸Niliichagua kuliko fimbo ya enzi na viti vya enzi, wala mali sikudhani kuwa ni kitu ikilinganishwa nayo;

⁹wala sikuifananisha na kito cha thamani; mradi dhahabu yote ya nchi ni kama mchanga kidogo mbele yake, na fedha itahesabiwa kama udongo.

¹⁰Niliipenda kupita afya njema na uzuri wa sura, hata zaidi ya nuru nikataka kuwa nayo, kwa maana mwangaza wake haufifii kamwe.

¹¹Pamoja nayo nikajiliwa na mema yote ya jamii, na mikononi mwake mali isiyoweza kuhesabika.

¹²Nami nikayafurahia hayo yote, kwa sababu Hekima ni kiongozi wake; ingawa sijajua kama yeye ndiye aliyeyazaa.

¹³Kama mimi nilivyojifunza pasipo hila, vivyo hivyo nawashirikisha watu pasipo choyo; mimi sifichi utajiri wake.

¹⁴Maana yeye amekuwa hazina kwa wanadamu isiyowaishia; nao wale waitumiao hujipatia urafiki na Mungu, wamesifiwa mbele zake kwa ajili ya karama zinazopatikana kwa malezi.

Sulemani Aomba Kupewa Hekima

¹⁵Lakini mimi Mungu anijalie kunena kwa akili, na kuwaza mawazo mazuri yastahiliyo yale niliyokwisha kujaliwa. Kwa kuwa Yeye mwenyewe ndiye kiongozi na Hekima, naye huwarudi wao walio na hekima.

¹⁶Kwa maana tumo mikononi mwake, sisi na maneno yetu; na ufahamu wote, na ujuzi wote wa ufundi kadha wa kadha.

¹⁷Madhali Yeye mwenyewe alinipa kujua kwa sahihi mambo yaliyoko; huluka ya ulimwengu na maungamanisho ya maumbile yake;

¹⁸mianzo ya nyakati, na miisho yake, na katikati yake; zamu za vituo vya jua, na mabadiliko ya majira;

¹⁹mafuatano ya miaka na makundi ya nyota;

²⁰asili ya viumbe hai, ukali wa hayawani, mshindo wa dhoruba, na mawazo ya binadamu; wa mimea umbalimbali na matumizi ya mizizi yake.

²¹Mambo yote yaliyo ya siri na yaliyo dhahiri nilijifunza; kwa kuwa Yeye aliyeyaratibisha yote pia alinifundisha, yaani Hekima.

Hali ya Hekima

²²Mradi ndani yake mna roho ya welekevu, takatifu, ya pekee, yenye namna mbalimbali, iliyoerevuka, nyepesi kuenea, dhahiri kusema, safi, wazi, isiyoharibika, ya kupenda wema, hodari

²³bila kuzuiwa, yenye ukarimu, ya kupenda wanadamu, thabiti, amini, bila mashaka, yenye nguvu, yenye kuangalia mambo yote, na kuingiliana na roho zote zilizo na welekevu, zilizo safi, zilizoerevuka sana.

²⁴Kwa sababu Hekima huenda upesi kila upande hata kupita mwendo wowote, naam, huenea kotekote katika mambo yote na kupenya ndani yake kwa ajili ya usafi wake.

²⁵Maana ndiyo pumzi ya uweza wa Mungu, na miminiko nakawa la utukufu wake Mwenyezi, hivyo lolote lililo najisi haliwezi kuingia ndani yake.

²⁶Ndiyo mwangaza kutoka kwa nuru ya milele, na kioo kisicho na mawaa cha kutenda kwake Mungu, na mfano wa wema wake.

²⁷Nayo ni moja, ina uwezo wa kutenda yote; hujikalia, huweza kuhuisha yote; na tangu kizazi hata kizazi huwaingilia roho takatifu, huwafanya wanadamu kuwa rafiki za Mungu na manabii;

²⁸maana Mungu humpenda yeye tu akaaye na Hekima.

²⁹Nzuri kuliko jua, Hekima hupita makundi ya nyota; ikilinganishwa na nuru, huonekana ya kuwa imezidi;

³⁰mradi baada ya nuru ya mchana hufuata usiku bali juu ya Hekima hakuna ovu liishindalo.